सांगोल्यात मॉलमध्ये चोरी करून एका घरातील सोन्या-चांदीच्या दागिने, रोख रक्कम चोरली

गुरूवारी पहाटेच्या घटना; घटनास्थळी सांगोला पोलिस दाखल

सांगोला : अज्ञात चोरट्यांनी एकाच रात्री मॉलसह घरफोडी करून अडीच तोळे सोन्याचे दागिने व जीवनावश्यक वस्तू असा अंदाजे ५ लाख रुपयांचा मुद्देमाल चोरून नेला. ही घटना गुरुवारी पहाटेच्या सुमारास महूद (ता. सांगोला) येथील लवटे गल्ली व पंढरपूर रोड वरील कुटुंब मॉल या ठिकाणी घडली. 

चोरट्यांनी महूद लवटे गल्ली येथील रमेश कांबळे यांच्या घरात घरफोडी करण्यापूर्वी आजूबाजूच्या घरांना बाहेरुन कड्या लावून घरात प्रवेश केला. कपाटात ठेवलेले दीड तोळ्याचे गंठण, पाच ग्रॅम सोन्याच्या दोन अंगठ्या, रोख दीड हजार रुपये चोरी केली. तेथून चोरट्यांनी आपला मोर्चा पंढरपुर रोडवरील कुटुंब माॅलकडे वळविला. चोरट्यानी माॅलच्या पाठीमागे असलेल्या शटरचे कुलूप तोडून आत प्रवेश केला. मॉलमधील साखर, तांदूळ, तेलाचे डब्यांसह जीवनावश्‍यक वस्तू चार चाकी वाहनात भरल्या. जाताना सीसीटीव्ही कॅमे-याची अद्यावत मशीन चोरी करून पोबारा केला. चोरीच्या घटनेची माहिती मिळताच सांगोला पोलीस स्टेशन कडील पोलीस अधिकारी कर्मचारी यांनी घटनास्थळी भेट देऊन पाहणी केली. याबाबत अज्ञात चोरट्याविरुद्ध गुन्हा दाखल करण्याची प्रक्रिया सुरू आहे.