गर्लफ्रेंडची हाैस पुरवण्यासाठी तो करायचा दुचाकींची चोरी

पंढरपुरात चोरलेली गाडी विक्री करणाऱ्या व्यक्तीला पकडून त्याच्याकडून ८ गाड्या जप्त केल्या. ही कारवाई पंढरपूर पोलिसांनी केली आहे. या प्रकरणी महादेव सगर (वय २६, रा. बत्तीस खोल्या, पंढरपूर) याला ताब्यात घेतले आहे.

पोलिसांकडून मिळालेल्या माहितीनुसार सोपान नारायण बंडगर (वय ४२, रा. सलगरे, ता. मिरज, जि. सांगली) व रुकमांगद एकनाथ सोनुरे (रा. लिंगनूर) हे दोघे २५ डिसेंबर रोजी पंढरपूर दर्शनासाठी मोटरसायकल (क्र. एमएच १० बीके ५१०६)वरून आले होते.

ते दोघे २६ डिसेंबर रोजी नामदेव पायरीचे दर्शन घेऊन एकादशीनिमित्त भजनाचे जागरच्या कार्यक्रमासाठी काळा मारुती वासकरवाडा येथे आले. तेथून त्यांची गाडी चोरीला गेली. याबाबत सोपान नारायण बंडगर याने पोलिसात तक्रार दिली.

यानंतर पोलीस निरीक्षक अरुण पवार, पोलीस उपनिरीक्षक राजेंद्र गाडेकर यांनी तपासाची चक्रे फिरवत गाडी चोरणारा हा पंढरपूरचा असल्याची माहिती काढली. त्यानंतर महादेव सगर याला ताब्यात घेतले. त्याच्याकडून ८ मोटरसायकली जप्त केल्या आहेत.

ही कारवाई पोलीस निरीक्षक अरुण पवार, पोलीस उपनिरीक्षक राजेंद्र गाडेकर, पोलीस कर्मचारी सूरज हेंबाडे, बिपीन ढेरे, गणेश पवार, शरद कदम, सुजीत जाधव, सुनील बनसोडे, राजेश गोसावी यांनी केली आहे.