बार्शीत आज रक्तदान शिबिरात शेकडो कार्यकर्ते करणार रक्तदान

बाजार समितीच्या सौदे हॉलमध्ये सकाळी ८ ते सायंकाळी ५ या वेळेत हे शिबिर आयोजित केले आहे. या शिबिराच्या तयारीसाठी मॉर्निंग क्लबचे अध्यक्ष नगरसेवक विजय राऊत, मर्चंट असो.चे अध्यक्ष बाबासाहेब कथले, त्यांची टीम मागील आठ दिवसांपासून तयारीला लागलेली आहे.

भगवंत ब्लड बँकेच्या वतीने या शिबिरातील रक्त संकलन केले जाणार आहे. शिबिराचा शुभारंभ आमदार राजेंद्र राऊत व माजी नगराध्यक्ष विश्वास बारबोले यांच्या हस्ते होणार आहे. यावेळी नगराध्यक्ष असिफ तांबोळी, उपविभागीय पोलीस अधिकारी अभिजित धाराशिवकर, तहसीलदार सुनील शेरखाने, पोलीस निरीक्षक संतोष गिरीगोसावी, गटविकास अधिकारी शेखर सावंत, पंचायत समितीचे सभापती अनिल डिसले, बाजार समितीचे सभापती रणवीर राऊत आदी मान्यवर उपस्थित राहणार आहेत.

बाजार समितीमधील सर्व व्यापारी बांधव, हमाल, तोलार, आडते या रक्तदान शिबिरात सहभागी होणार आहेत. शिवाय मॉर्निंग क्लबची सर्व टीम, नगरसेवक, शहर व ग्रामीण भागातील भाजपचे पदाधिकारी यांच्यावर शिबिराची जबाबदारी सोपवली असल्याचे सभापती रणवीर राऊत यांनी सांगितले.

शहरातील विविध संस्था व सामाजिक संघटना यांचे कार्यकर्ते व सर्वसामान्य नागरिक, भाजपचे पदाधिकारी व कार्यकर्ते यांनी या रक्तदान शिबिरात सहभागी व्हावे, असे आवाहन आमदार राजेंद्र राऊत व बाजार समितीचे संचालक रावसाहेब मनगिरे यांनी केले आहे.