पत्नीवर खुनीहल्ला करून पतीने केली आत्महत्या

वैराग : धामणगाव (ता. बार्शी) येथे घरगुती कारणावरून पत्नीच्या गळ्यावर चाकूने वार करून त्याच चाकूने स्वत:चा गळा चिरून घेऊन आत्महत्या केल्याची हृदयद्रावक घटना शुक्रवारी दुपारी घडली. मयत उत्तम शंकर गाडे (वय ६५) आणि जखमी मथुरा उत्तम गाडे (वय ६०) असे या दाम्पत्याचे नाव आहे. याबाबत सून रेश्मा गाडे यांनी वैराग पोलीस ठाण्यात फिर्याद दिली आहे.

पोलीस सूत्राकडील माहितीनुसार, उत्तम आणि मथुरा गाडे या दाम्पत्यास दोन मुले आहेत. दोघे विभक्त राहतात. शुक्रवारी मथुरा उत्तम गाडे या धाकट्या मुलाकडे शेळ्यांसाठी चारा घेऊन आल्या होत्या. शेतातून कंटाळून आल्याने त्या अंगणात लोखंडी काॅटवर आराम करीत होत्या.

दरम्यान, पती उत्तम शंकर गाडे हे गावातून तावातावाने आले. त्या वेळी या दाम्पत्यामध्ये घरगुती कारणावरून वाद झाला. या वेळी खुनीहल्ल्याचा व आत्महत्येचा प्रकार घडला.

दरम्यान, जखमी मथुरा यांना वैद्यकीय उपचारासाठी बार्शी येथे दाखल केले आहे. अधिक तपास साहाय्यक पोलीस निरीक्षक महारूद्र परजणे करीत आहेत.

---

दोन्ही मुले बाहेर गेली अन् वाद सुरु झाला

या दाम्पत्यात घरगुती कारणावरून वाद सुरु झाला. हा वाद होण्यापूर्वी मुले घरातून बाहेर गेली होती. तेथे त्यांचा वाद सोडवायला कोणीच नव्हते. दोघांत कडाक्याचे भांडण झाले. या वादविवादाचे पर्यावसान पत्नीवरील हल्ल्यात झाले. मथुरा यांच्या गळ्यावर व पोटावर लोखंडी सुरीने वार करून गंभीर जखमी केले. त्यानंतर त्याच सुरीने उत्तमने स्वतःचा गळा कापून घेतला. या घटनेत ते जागेवरच मरण पावले.