राष्ट्रपुरुषांचा अवमान प्रकरणी इचलकरंजीतून युवकाला अटक

सोलापूर : सोशल साईटवरुन राष्ट्रपुरुषांचा अवमान करणारे छायाचित्र आणि मजकूर पोस्ट केल्याप्रकरणी इचलकरंजीतून विजय मल्लप्पा जेऊर या युवकाला गुन्हे शाखेच्या पथकाने अटक केली़

सोलापूर : सोशल साईटवरुन राष्ट्रपुरुषांचा अवमान करणारे छायाचित्र आणि मजकूर पोस्ट केल्याप्रकरणी इचलकरंजीतून (जि़ कोल्हापूर) विजय मल्लप्पा जेऊर (वय २२) या युवकाला गुरुवारी गुन्हे शाखेच्या पथकाने अटक केली़ त्याला आज येथील न्यायालयात हजर केले असता एक दिवसाची पोलीस कोठडी सुनावली़
सोशल साईटवरुन राष्ट्रपुरुषांचा अवमान झाल्याप्रकरणी ७ जून रोजी विजापूर नाका पोलीस ठाण्यात सत्यजित सुबोध वाघमोडे यांनी फिर्याद दिली होती़ गुन्हे शाखेच्या सायबर क्राईम शाखेतून या प्रकरणाचा तपास केला जात असताना या साईटवर सातत्याने पोस्ट करणाऱ्या संशयित व्यक्तीचे अकौंट समोर आले होते़ इचलकरंजीतून ‘झकास ग्रुप’च्या अकौंटवर ही पोस्ट पडत असत़ गुन्हे शाखेचे सहायक पोलीस आयुक्त खुशालचंद बाहेती यांच्या मार्गदर्शनाखाली एक पथक त्याच्या मागावर होते़ अखेर या पथकाने गुरुवारी त्याला इचलकरंजीतून ताब्यात घेतले़ यापूर्वी या प्रकरणात औदुंबर तुकाराम सरवदे या युवकाला उजनी कॉलनीतून ताब्यात घेतले होते़ आता या प्रकरणात अटक केलेल्या आरोपींची संख्या दोन झाली आहे़