आठ वर्षाच्या मुलीशी अश्लील वर्तन; चुलत्यासह दोघांविरुद्ध गुन्हा दाखल

यातील पिडितेच्या पित्यास अटक करण्यात आली आहे.

सोलापूर : आठ वर्षाच्या मुलीशी तिच्या चुलत्याने अश्लील वर्तन केले. हा प्रकार माहिती असूनही पतीने लपवून ठेवला म्हणून पिडितेच्या आईने पतीसह, दीराविरुद्ध पोलिसात तक्रार दिली. जेलरोड पोलीस ठाण्यात या प्रकरणी दोघांविरुद्ध गुन्हा नोंदला आहे. यातील पिडितेच्या पित्यास अटक करण्यात आली आहे.

फिर्यादीत म्हटले आहे की, शहरातील एका भागामध्ये पिडितेचे आई तिच्या तीन मुली पतीसह राहत होते. तिन्ही मुली झाल्याने पतीशी भांडण झाल्याने १२ ऑगस्टपासून पिडितेची आई व मुली वेगळे राहतात. पिडितेची आई खासगी नोकरी करते. यातील पिडितेची आठ वर्षाच्या मुलीला त्रास होऊ लागल्याने तिच्या आईने विचारणा केली असता एक दिवशी चुलत्याने अश्लील वर्तन केल्याचे सांगितले.

हा प्रकार नवऱ्याला माहिती असतानाही त्यांनी पत्नीपासून हा प्रकार लपवून ठेवल्याने पिडितेच्या आईने पोलिसांकडे धाव घेऊन तक्रार दिल्याने अत्याचार व बाल लैंगिक कायद्यान्वये गुन्हा नोंदला आहे. पिडित मुलीच्या पित्यास माहिती लपवून ठेवली म्हणून अटक केली आहे.