हॉटेल चालविणाऱ्या बहिणींशी अश्लील वर्तन; जाब विचारणाऱ्या दोघांना बॅटनं मारहाण

गेल्या तीन-चार महिण्यापासून वरील आरोपी हॉटेलवर येऊन अश्लील चाळे, हातवारे करुन लज्जास्पद वर्तन करायचा.

सोलापूर : आर्थिक उपजीवेकेसाठी हॉटेल चालवणाऱ्या दोघी बहिणींशी हातवारे इशारे करुन एका तरुणाकडून अश्लील वर्तन करण्याचा प्रयत्न दपारी साडेतीनच्या सुमारास शहरातील परिसरात घडला. उलट जाब विचारणाऱ्या पिडितेच्या पती आणि त्याच्या मित्राला बॅटनं बेदम मारहाण केली. या प्रकरणी बालाजी वनदेव खडके याच्या विरुद्ध विनयभंगाचा गुन्हा सदर बझार पोलीस ठाण्यात नोंदला आहे. यातील पिडित तरुणीने दिलेल्या फिर्यादीत म्हटले आहे की, यातील फिर्यादी व तिचे पती, बहीण हे हॉटेल व्यवसायातून आपली उपजीविका भागवतात. गेल्या तीन-चार महिण्यापासून वरील आरोपी हॉटेलवर येऊन अश्लील चाळे, हातवारे करुन लज्जास्पद वर्तन करायचा. रविवारीही सकाळी पिडित फिर्यादीशी अशाच प्रकारचे वर्तन केले. दुपारी फिर्यादीच्या बहिणीशीही असे कृत्य केले.

या प्रकाराबद्दल फिर्यादीने पतीला या बद्दल माहिती दिली. फिर्यादीचा पती व त्याचा मित्र दोघांनी याचा जाब विचारणा केली असता त्याला दमदाटी, शिवीगाळ करुन लाकडी बॅटनं दोघांना बेदम मारहाण केल्याचे फिर्यादीत म्हटले आहे.

या प्रकरणी पिडितेने सदर बझार पोलीस ठाण्यात धाव घेऊन फिर्याद दिल्याने नमूद आरोपीविरुद्ध भा. दं. वि. ३५४ अन्वये गुन्हा नोंदला आहे. पुढील तपास सपोनि दिनेश कुलकर्णी करीत आहेत.