जीप पलटी होऊन टेंभुर्णीजवळ चालक ठार

टेंभुर्णी : पुणे-सोलापूर रस्त्यावर टेंभुर्णी जवळच धोका फार्म हाऊस जवळ जीप पलटी होऊन झालेल्या अपघातात चालक जागीच ठार झाला तर कळम तालुक्यातील एक जण गंभीर जखमी झाला.

रविवारी पहाटे ३.३० च्या दरम्यान हा अपघात घडला. या अपघातात प्रवीण औदुंबर नलवडे (२६, रा. लऊळ, ता. माढा) हा जीप चालक जागीच ठार झाला तर त्याचा जोडीदार राजेश लक्ष्मण माने (रा. मोहा, ता. कळम) हा गंभीर जखमी झाला. त्याच्यावर येथील येथील खासगी रुग्णालयात उपचार सुरू आहेत.

पेालीस सूत्रानुसार मिळालेल्या माहितीनुसार प्रवीण नलावडे हा स्वतःच्या जीपमधून मालवाहतूक करण्याचा व्यवसाय करीत होता. शनिवारी रात्री तो पुणे येथून कोल्ड्रिंक्स भरून कुर्डूवाडीकडे निघालेला होता. त्याच्यासोबत मोहा येथील राजेश माने हा साथीदार कुर्डूवाडीकडे निघाला होता. रविवारी पहाटे जीप टेंभुर्णीजवळील धोका फार्म हाऊसजवळ आली असता ती पलटी झाली. या अपघातात प्रवीण नलावडे हा जागीच ठार झाला तर त्याचा जोडीदार राजेश माने गंभीर जखमी झाला.

याबाबत प्रवीण लक्ष्मण नलवडे यांनी टेंभुर्णी पोलीस ठाण्यात फिर्याद दिली आहे. अधिक तपास पोलीस हवालदार एम.डी. तांबोळी करीत आहेत.

----