अज्ञात चोरट्यांकडून ४८ हजारांचा मुद्देमाल लंपास

सांगोला : अज्ञात चोरट्यांनी बंद घराची कडी उघडून आत प्रवेश करत पत्र्याच्या पेटीचे कुलूप तोडून पेटीतील २४ ग्रॅम सोन्याचे दागिने व रोख ५ हजार, असा ४८ हजार रुपयांचा ऐवज चोरून नेला. ही घटना शनिवारी पहाटेच्या सुमारास नवी लोटेवाडी (ता. सांगोला) येथे घडली.

नवी लोटेवाडी येथील ब्रह्मदेव जगन्नाथ काटे शुक्रवारी रात्री कुटुंबीयांसमवेत जेवण करून उकाड्यामुळे घराला कडी लावून ओट्यावर झोपले होते. दरम्यान, शनिवारी पहाटे ४ वाजेच्या सुमारास वडील लघुशंकेसाठी उठले असता त्यांना घराचा दरवाजा उघडा दिसला. त्यांनी मुलगा जगन्नाथ यास उठवले. त्याने घरात जाऊन पाहिले असता पत्र्याची पेटी गायब होती. त्यांनी कुटुंबीयांसमवेत पेटीचा शोध घेतला असता ती घराच्या पाठीमागे डाळिंबाच्या बागेत मिळून आली. मात्र, चोरट्यांनी पेटीचे कुलूप तोडून १ तोळा सोन्याची बोरमाळ, १ तोळ्याचे सोन्याचे गंठण, ४ ग्रॅम सोन्याची कर्णफुले व रोख ५ हजार रुपये गायब असल्याचे दिसून आले. याबाबत ब्रह्मदेव जगन्नाथ काटे (रा. नवी लोटेवाडी) यांनी अज्ञात चोरट्याविरुद्ध पोलिसांत फिर्याद दाखल केली आहे.