लेकीला पोटाशी बांधून आईने मारली विहिरीत उडी

होटगी येथील राचम्मा संतोष पटणे (वय २७) यांचे सोमवारी पती सोबत कडाक्याचे भांडण झाले. दुस-या दिवशी राचम्मा यांनी आपली मुलगी चैत्रा (६) हिला सोबत घेऊन फताटेवाडीच्या हद्दीतील अशोक चव्हाण यांच्या विहिरीकडे गेल्या. लेकीला पोटाशी बांधून त्यानी विहिरीत उडी मारली. दोन दिवस नातलगांनी शोधाशोध केली, पण त्यांचा शोध लागला नव्हता. बुधवारी दुपारनंतर दोघींचेही प्रेत विहिरीच्या पाण्यावर तरंगताना आढळून आले. ग्रामस्थांच्या मदतीने वळसंगच्या पोलिसांनी दोन्ही मृतदेह पाण्याबाहेर काढले.

मृत राचमा आणि संतोष यांना मुलगा चरण आणि मुलगी चैत्रा अशी दोन अपत्ये होती. मंगळवारी सकाळी मुलगी चैत्राला सोबत घेऊन जाताना चरण बाहेर खेळण्यासाठी गेला होता. त्याला सोडून राचम्मा लेकीला घेऊन बाहेर पडल्या होत्या. त्यामुळे चरण बचावला. राचम्मा आणि संतोष दोघेही मोलमजुरी करून उपजीविका करतात. या घटनेने होटगी परिसरात हळहळ व्यक्त केली जात आहे. वळसंग पोलीस ठाण्याचे सहाय्यक पोलीस निरीक्षक अतुल भोसले, फौजदार स्वामीराव पाटील तपास करत आहेत.