वेडाच्या भरात केला

लोकमत न्यूज नेटवर्क

करमाळा : जिंती येथे एकुलत्या एक मुलाने वेडाच्या भरात वृद्ध पित्यास बेदम मारहाण केली. या मारहाणीत त्यांचा मृत्यू झाला आहे.

राजाराम मारुती जगताप (वय ७५, रा. जिंती, ता. करमाळा) असे मरण पावलेल्या वृद्ध पित्याचे नाव असून याप्रकरणी पोलिसांनी आरोपी अंकुश राजाराम जगताप (वय ४०, रा.जिंती, ता. करमाळा) याच्याविरुद्ध गुन्हा दाखल केला असून त्याला ताब्यात घेतले आहे.

पोलीस सूत्राकडील माहितीनुसार राजाराम जगताप यांना अंकुश नावाचा एकुलता एक मुलगा आहे. तो विवाहित असून त्याला दोन मुले आहेत. काही वर्षांपासून मानसिक आजाराने पीडित आहे. काही दिवस मनोरुग्णालयात त्याच्यावर उपचार सुरू होते. पण तो या आजारातून पूर्णत: बरा झालेला नव्हता.

तो मद्यपान करून दिवसभर रेल्वे गेटवरून गावात चकरा मारत होता. वर्षभरापूर्वी त्याची पत्नी त्याला सोडून माहेरी गेली आहे. जगताप यांची वस्ती गावाबाहेर असून जवळपास कोणी नाही. गुरुवार, २ सप्टेंबर रोजी रात्री अंकुश हा दारू पिऊन आला आणि वेडाच्या भरात वडिलास बेशुद्ध पडेपर्यंत मारले.

---------

जिल्हापरिषद सदस्य धावल्या मदतीला

जिल्हा परिषद सदस्या सवितादेवी राजेभोसले यांना सकाळी हा प्रकार समजताच त्यांनी राजाराम जगताप यांना वाहन करून करमाळा येथे हलविले. गंभीर जखमी अवस्थेतील जगताप यांचा रस्त्यातच मृत्यू झाला. पोलिसांनी मृतदेह शवविच्छेदनासाठी कुटीर रुग्णालयात पाठवला.