टेंभुर्णी हद्दीत मोठा अपघात; कोंडी गावातील दोन महिलांना ट्रकने चिरडले

सोलापूर लोकमत ब्रेकिंग

टेंभुर्णी : पुणे-सोलापूर राष्ट्रीय महामार्गावर टेंभुर्णीच्या हद्दीत एका मालट्रकने रस्त्यावर उभ्या असलेल्या दोन महिलांना चिरडल्याने त्या जागीच ठार झाल्या. त्यापुढे मालट्रकने आणखी चार वाहनाला धडक देऊन नुकसान केले. ही घटना बुधवारी रात्री उशिरा घडली. 

याबाबत टेंभुर्णी पोलीस ठाण्यातून मिळालेली माहिती अशी की, बुधवारी २३ मार्च रोजी रात्री १०.१५ वाजण्याच्या सुमारास सोलापूर महामार्गावरील हॉटेल जगदंबाच्या समोर भरधाव आलेल्या मालट्रकने हॉटेलसमोर उभ्या असलेल्या जयश्री चंद्रकांत वर्पे (वय ५५) व शांताबाई विठ्ठल चवरे (वय ७५) दोघी रा. कोंडी ता. उत्तर सोलापूर) यांना धडक दिल्याने त्या गंभीर जखमी होऊन जागीच ठार झाल्या. मालट्रक तसाच पुढे वेगाने गेल्याने हॉटेल समोरील मालट्रक (क्र-एम.एच-११-सीएच-८३००), स्कॉर्पिओ (एम.एच-१५-एजे ०१००), दुचाकी (क्र-एम.एच-४५-एके-५२७४), एकोस्पोर्ट गाडी (क्र.एम.एच ; १३ डीई-५२५६), (एम.एच-१३-सीयु-६५०२) व (एम.एच-४५ए.एल-८१४६) या गाड्यांना जोरात धडक देऊन या वाहनांचे मोठे नुकसान केले. तसेच अपघात होताच चालक संदीपान नवनाथ जगताप (रा. गौरगाव ता.कळंब) हा पळून गेला.  याबाबत जयंत पोपट साठे (रा. बीबी दारफळ) याने फिर्याद दिली असून सपोनि ओमासे हे अधिक तपास करीत आहेत.