गुरुजीला आत्महत्या करायला लावणारा

संशयित मोबाईलच्या लोकेशनवरुन सापडला

करमाळा : गुळसडी येथील शाळेतील शिक्षक बळीराम वारे यांना आत्महत्येस प्रवृत्त केल्याप्रकरणी एका संशयित आरोपीला पोलिसांनी त्याच्या मोबाईल लोकेशनवरुन अटक केली. शुक्रवारी त्याला न्यायालयात हजर केल्यानंतर २६ जुलैपर्यंत पोलीस कोठडी देण्यात आली.

करमाळा येथील गणेश नगरमध्ये राहणारे शिक्षक वारे हे गुळसडी येथे शिक्षक म्हणून कार्यरत होते. या गावात जमिनीचा १४ लाख रुपयांचा आर्थिक व्यवहार होऊनही जमिनीचा कब्जा न देता रमेश मोहन यादव व हनुमंत बागल दमबाजी करत होते. त्यांच्या त्रासाला कंटाळून सहशिक्षक बळीराम वारे यांनी २२ जुलैला पहाटे आत्महत्या केली.

आत्महत्येपूर्वी वारे यांनी या आशयाची चिठ्ठी लिहून ठेवली होती. त्यानुसार या दोघांच्या विरुद्ध आत्महत्येस प्रवृत्त केल्याचा गुन्हा नोंदला होता. गुन्हा दाखल झाल्यावर सहायक पोलीस निरीक्षक सचिन जगताप यांनी संशयित आरोपीचा शोध घेतला, पण दोघे घरी नव्हते. त्यानंतर मोबाइल लोकेशन तपासले. त्यापैकी रमेश यादवचे ठिकाण सापडले. पोलिसांनी त्यास तत्काळ पकडून अटक केली. शुक्रवार (ता. २३) रोजी संशयितास न्यायालयात न्यायाधीश शिवरात्रे यांच्यासमोर हजर केले असता, या आरोपीस २६ जुलैपर्यंत पोलीस कोठडी दिली आहे.

---