अल्पवयीन मुलीवर अत्याचार करुन कानातील रिंगा पळविल्या

मंद्रूप : एका अल्पवयीन मुलीवर (वय १३) विवाहित तरुणाने अत्याचार करुन तिच्या कानातील सोन्याच्या रिंगा पळविल्याचा प्रकार निदर्शनास आला आहे. याप्रकरणी मंद्रूप पोलिसांनी संशयित आरोपीला अटक करून न्यायालयात उभे केले असता न्यायालयाने पाच दिवसांची पोलीस कोठडी सुनावली.

पोलीस सुत्रांकडील माहितीनुसार आरोपी गोरख राठोड याने पीडित मुलगी एकटी असल्याचे पाहून तिला मोटारसायकलवरून एका शेतात नेले. तेथे दोन ते तीन वाजेच्या दरम्यान तिच्यावर अत्याचार केला. जबरदस्ती केल्याने मुलगी बेशुद्ध झाली. त्यानंतर त्याने मुलीच्या कानातील सोन्याच्या रिंगा काढून घेऊन तो तेथून पसार झाला. काही वेळाने तेथून जाणाऱ्या एका महिलेने या मुलीला पाहिले. त्यानंतर घरच्यांना ही माहिती मिळाली. त्यांनी मंद्रूप येथे धाव घेतली.

या घटनेचे गांभीर्य ओळखून सहायक पोलीस निरीक्षक नितीन थेटे यांनी घटनास्थळी जाऊन पाहणी केली. बाजारातील दुकानांचे सीसीटीव्ही फुटेज तपासून त्याला ताब्यात घेतले. पीडित मुलीची प्रकृती गंभीर असून, तिच्यावर शासकीय रुग्णालयात उपचार सुरू असल्याचे पोलिसांनी सांगितले.

आरोपीला न्यायालयात हजर केले असता न्यायालयाने आरोपीस २५ जानेवारीपर्यंत पोलीस कोठडी सुनावली.