घराबाहेर झोपलेल्या एकाचा डोक्यात दगड घालून केला खून; सरकोली येथील घटना

पंढरपूर पोलीसांचे पथक घटनास्थळी; डोक्याला गंभीर दुखापत झाल्याने जागीच मृत्यू

ठळक मुद्दे- या घटनेची माहिती मिळताच पंढरपूर पोलीसांचे पथक घटनास्थळी दाखल- मृत संतोष कपणे याचे मृतदेह शवविच्छेदनासाठी रूग्णालयात दाखल- सरकोलीतील घटनेने पंढरपूर तालुक्यात खळबळ...

पंढरपूर : पंढरपूर तालुक्यातील सरकोली येथे एकाची निर्घृण हत्या करण्यात आली. डोक्यात दगड घालून खून केल्याची प्राथमिक माहिती पोलिसांनी दिली़ ही घटना शुक्रवारी घडली असल्याचा प्राथमिक अंदाज पोलीस प्रशासनाकडून लावण्यात येत आहे. मृत्यू झालेल्या इसमाचे नाव संतोष सुरेश कपणे असे आहे.

पंढरपूर तालुक्यातील सरकोली इसमाचा खून झाल्याची माहिती मिळताच उपविभागीय पोलिस अधिकारी डॉ. सागर कवडे, पोलीस निरीक्षक किरण अवचर यांनी घटनास्थळी भेट दिली. संतोष सुरेश कपणे (वय ३१, रा. सरकोली, ता. पंढरपूर) हे घराच्या बाहेर झोपले असताना त्यांच्या डोक्यामध्ये अज्ञात इसमाने दगड मारला. त्यामुळे त्यांच्या डोक्याला गंभीर दुखापत होऊन त्याचा जागीच मृत्यू झाल्याचा प्राथमिक अंदाज पोलिसांनी वर्तवला आहे.