राष्ट्रवादीचा अकलूज नगर परिषदेला विरोध नाही

यशवंतनगर व संग्रामनगर ग्रामपंचायतींचा समावेश करूनच अकलूज-माळेवाडी (अ) ग्रामपंचायतीचे नगर परिषदेमध्ये रूपांतर करण्याच्या मागणीसाठी राष्ट्रवादीचे सोलापूर जिल्हा सरचिटणीस किरण साठे यांच्या नेतृत्वाखाली चालू असलेल्या आंदोलनाच्या अनुषंगाने उपमुख्यमंत्री अजित पवार यांना भेटण्यासाठी वेळ देऊन २२ जून रोजी साठे यांना मंत्रालयात बोलविण्यात आले होते. सदर निवेदन नगरविकासमंत्री एकनाथ शिंदे यांच्या कार्यालयात सादर करण्याच्या सूचना उपमुख्यमंत्री अजित पवार यांनी दिल्या होत्या.

राष्ट्रवादी काँग्रेसचे जिल्हा सरचिटणीस किरण साठे यांना उपविभागीय अधिकारी अकलूज यांच्याकडून लेखी पत्र देऊन सहायक आयुक्त नगर परिषद प्रशासन विभाग, जिल्हाधिकारी कार्यालय सोलापूर यांच्याकडे अहवाल सादर केल्याचे कळविले असल्याने अकलूजमध्ये चालू असलेल्या बेमुदत ठिय्या आंदोलनाची सांगता २३ जून रोजी करण्यात आली.

कोट :::::::::::::

राष्ट्रवादीच्या कार्यकर्त्यांसाठी २२ जून रोजी उपमुख्यमंत्री अजित पवार यांना भेटण्यासाठीची वेळ दिली होती. भेटल्यानंतर त्यांनी नगरविकास विकास विभागाला निवेदन देण्यासाठी सांगितल्याने अजित पवार यांचा अकलूज नगर परिषदेसाठी विरोध असण्याचा प्रश्नच येत नाही. त्यामुळे मोहिते-पाटील यांनी केलेले आरोप हे निष्फळ व जनतेची दिशाभूल करणारे आहेत.

- किरण साठे

सरचिटणीस, सोलापूर जिल्हा,

राष्ट्रवादी काँग्रेस पार्टी