सोलापुरातील चौपाड सिटी पोस्ट इमारतीच्या गॅलरीचा भाग कोसळला

आज गणपती विसर्जनाचा दिवस आहे. चौपाड परिसरातील बहुतांश मंडळांच्या मिरवणुका पोस्ट कार्यालयाच्या समोरून जातात.  

सोलापूर : शहरात असलेल्या चौपाड सिटी पोस्ट इमारतीच्या गॅलरीचा भाग आज दुपारच्या सुमारास कोसळला. सुदैवाने या घटनेत कोणतीही जीवितहानी झाली नाही. दरम्यान, प्राथमिक माहितीनुसार, आज गणपती विसर्जनाचा दिवस आहे. चौपाड परिसरातील बहुतांश मंडळांच्या मिरवणुका पोस्ट कार्यालयाच्या समोरून जातात.  

शासनाने ईद-ए-मिलाद निमित्त शुक्रवारी सुट्टी जाहीर केल्यामुळे आज गुरुवारी पोस्ट कार्यालय सुरू होते. मात्र पोस्टमध्ये गर्दी नव्हती. सकाळच्या सत्रात पोस्ट कार्यालयाची इमारतीचा काही भाग कोसळून मोठे नुकसान झाले, मात्र कोणतीही जीवित हानी झाली नसल्याचे सांगण्यात आले. 

या घटनेनंतर परिसरातील नागरिकांनी गर्दी केली होती. पोस्ट कार्यालयातील अधिकाऱ्याने संबंधित यंत्रणेला संपर्क साधून घडलेल्या घटनेची माहिती दिली. याच घटनेची माहिती मिळताच शहर पोलीस व महापालिकेची यंत्रणा घटनास्थळी दाखल झाली होती.