दुचाकीचा काढला फोटो; चौघा वाळूमाफियांनी केली मारहाण

मेडशिंगी येथील सचिन पाटील हा तरुण गुरुवारी पहाटे ३ च्या सुमारास नदीवर असलेल्या विहिरीवरील विद्युत पंप चालू करून डाळिंब बागेत ड्रीप चालू आहे का? हे बॅटरीने पाहत होता. त्यावेळी अनोळखी व्यक्ती नदीत वाळू भरत असताना बॅटरीचा प्रकाश पाहून पळून गेले. त्याने बागेतील ड्रीप कोणी कापून वगैरे टाकले आहे का? हे पाहत असताना पळून गेलेले नितीन नामदेव पाटोळे, अर्जुन कसबे हे दोघे त्याच्याजवळ आले तर सांगोला येथील रवी शिवाजी भोसले व बबलू शिवाजी भोसले हे दोघे दुचाकीवरून तेथे येऊन नदीवर गेले. दरम्यान सचिन सोनलकर (एमएच ४५ /एजी ८३०४) दुचाकीचा फोटो काढून घराकडे परतला.

सकाळी ६ च्या सुमारास रवी भोसले यांनी सचिन सोनलकर यास फोन करून मरीआई मंदिरासमोर बोलावून घेतले. तेथे नितीन पाटोळे, अमित कसबे, रवी भोसले व बबलू भोसले या चौघांनी तू आमच्या दुचाकीचा फोटो का काढलास? असे म्हणून त्यास शिवीगाळ करत मारहाण केली. सचिन सोनलकर यास डोक्यात मारल्यामुळे चक्कर येऊन खाली पडला. त्यास सागर राऊत व राहुल खडतरे यांनी सांगोला येथील ग्रामीण रुग्णालयात उपचारासाठी दाखल केले. याबाबत सचिन सोनलकर यांनी चौघांविरुद्ध फिर्याद दाखल केली आहे.