महिला क्रिकेट टीमच्या कॅप्टनची अंगठी अन् मोबाईल पळविला

 राज्य पातळीवरील क्रिकेट सामन्या करिता निवड चाचणीचे सामने सुरू होण्यापूर्वी टॉस करण्याकरिता गेलेल्या महिला क्रिकेट टीमच्या कॅप्टनचा मोबाईल आणि सोन्याची अंगठी पळविली.

सोलापूर:  राज्य पातळीवरील क्रिकेट सामन्या करिता निवड चाचणीचे सामने सुरू होण्यापूर्वी टॉस करण्याकरिता गेलेल्या महिला क्रिकेट टीमच्या कॅप्टनचा मोबाईल आणि सोन्याची अंगठी पळविली. घटना रविवारी सकाळी आठ ते अकराच्या दरम्यान घडली.

समृद्धी जयवंत डाळे ( वय १९ रा. पलुस, जिल्हा सांगली) यांनी फिर्याद दिली आहे. जुळे सोलापुरातील भंडारे क्रिकेट मैदानात राज्यस्तरीय क्रिकेट सामन्यासाठी निवड चाचणीचे सामने सुरू आहेत. फिर्यादी या सांगली येथील महिला क्रिकेट टीमच्या कॅप्टन आहेत. रविवारी भंडारी मैदानात राज्यस्तरीय सामन्या करिता निवड चाचणीचे क्रिकेट सामने झाले. क्रिकेट सामन्यापूर्वी टॉस करण्याकरिता समृद्धी मैदानात गेल्या. तत्पूर्वी त्यांनी त्यांची मोबाईल तसेच सोने व चांदीची अंगठी असलेली बॅग मैदानाच्या प्रवेशद्वाराजवळ ठेवली होती. 

टॉस करून आल्यानंतर त्यांना तेथे त्यांची बॅग दिसून आली नाही. त्यांनी तेथे चौकशी केली, परंतु त्यांची दागिने व मोबाईल असलेले बॅग मिळून आली नाही. या प्रकरणी समृद्धी आणि विजापूर नाका पोलीस ठाण्यात अनोळखी व्यक्तीविरुद्ध तक्रार नोंदवली आहे. या तक्रारीचा तपास पोलीस हवालदार घुगे करीत आहेत.