खुल्या प्रवर्गाच्या जागेवर अनुसूचित जाती प्रवर्गातील सरपंचाची निवड

गादेगावच्या सरपंचपदासाठी झालेल्या निवडणुकीनंतर २७ जानेवारी रोजी काढलेल्या आरक्षण सोडतीत सरपंचपद अनुसूचित जाती महिलेसाठी राखीव झाले होते. त्यामुळे या प्रवर्गातील एकमेव सदस्या ज्योती बाबर यांची सरपंचपदी निवड निश्चित मानली जात होती.

दरम्यान, पंढरपूर तालुक्यातील सर्वच ग्रामपंचायतींचे न्यायालयीन प्रकरणानंतर फेर आरक्षण काढण्यात आले. त्यामध्ये गादेगावचे आरक्षण सर्वसाधारण महिलेसाठी खुले झाले होते. फेरआरक्षण सोडतीचे ज्योती बाबर यांनीही स्वागत केले होते. मात्र, त्यांची सरपंचपदाची संधी हुकल्याने सर्व ग्रामस्थांनी खुल्या जागेवरून ज्योती बाबर यांना सरपंच करण्याचे ठरविले आणि त्यानुसार २६ फेब्रुवारी रोजी सरपंच निवडीवेळी केवळ ज्योती बाबर यांचाच अर्ज दाखल झाला अन‌् त्यांची बिनविरोध निवड झाली.

उपसरपंचपदासाठी योगेश बागल या युवकाची निवड झाली. सरपंच आणि उपसरपंच हे दोघेही पहिल्यांदाच ग्रामपंचायत सदस्य झाले असून, दोघेही पदवीधर आहेत. ग्रामस्थांच्या या निर्णयाबद्दल नूतन सरपंच ज्योती बाबर आणि उपसरपंच योगेश बागल यांनी आभार मानले. निवडीनंतर नूतन सरपंच आणि उपसरपंचांचा सत्कार करण्यात आला.