शरद बनसोडेंच्या विजयाने शहरात ठिकठिकाणी जल्लोष

कहीं दीप जले, कहीं दिल : काँग्रेसमध्ये सन्नाटा तर भाजपाकडून विजयोत्सव साजरा

 

सोलापूर : सोलापूर लोकसभा मतदारसंघातील महायुतीचे उमेदवार अ‍ॅड. शरद बनसोडे यांच्या विजयाची घोषणा होताच, शहरात ठिकठिकाणी भाजपा कार्यकर्त्यांकडून जल्लोष करण्यात आला. फटाक्यांची आतषबाजी करीत ‘अब की बार मोदी सरकार...’ असा जयघोष करीत कार्यकर्त्यांनी आनंदोत्सव साजरा केला. शुक्रवारी सकाळपासून शासकीय गोदाम येथे मतमोजणीला सुरुवात झाली. पहिल्या फेरीपासूनच महायुतीचे उमेदवार अ‍ॅड. शरद बनसोडे हे आघाडीवर असल्याने ९ व्या फेरीतील ५२ हजारांचा लीड जाहीर झाल्यानंतर शहरात ठिकठिकाणी भाजपाच्या कार्यकर्त्यांनी फटाक्यांची आतषबाजी करण्यास सुरुवात केली. दुपारी २ वा. निकाल जाहीर होताच आमदार विजयकुमार देशमुख यांच्या नवीपेठ येथील संपर्क कार्यालयाजवळ लोकांनी मोठी गर्दी केली. ढोल ताशांच्या आवाजात गुलालाची उधळण करीत भगवे झेंडे उंचावून कार्यकर्ते बेधुंद होऊन नाचत होते. दुपारी ३ वा. अ‍ॅड. शरद बनसोडे हे कार्यालयात आले तेव्हा कार्यकर्त्यांनी जल्लोष करीत त्यांचे स्वागत केले. हार घालून, फेटे बांधून कार्यकर्त्यांनी अब की बार मोदी सरकार...बनसोडे साहेबांचा विजय असो अशा घोषणा दिल्या. यावेळी आमदार विजयकुमार देशमुख, आमदार सिद्रामप्पा पाटील, शिवसेनेचे जिल्हा सहसंपर्कप्रमुख पुरुषोत्तम बरडे, नगरसेवक अमर पुदाले, अविनाश पाटील, संजय कोळी, पिंटू महाले आदी कार्यकर्ते मोठ्या संख्येने उपस्थित होते. बनसोडे यांच्या निवडीबद्दल रिपब्लिकन पार्टी आॅफ इंडिया (आठवले) च्या वतीने सिद्धार्थ चौक येथे जल्लोष करण्यात आला. रिपाइंचे प्रदेश उपाध्यक्ष प्रमोद गायकवाड यांच्या हस्ते मिठाईचे वाटप करण्यात आले.