सोलापुरात शिवसेना आक्रमक; घाण पाण्याच्या बाटलीच्या पुष्पगुच्छाने पालिका अधिकाऱ्याचा सत्कार

आठ दिवसात कार्यवाही न झाल्यास उग्र आंदोलन छेडण्याचा इशारा देण्यात आला. 

आप्पासाहेब पाटील, सोलापूर: शहराला अळ्या युक्त घाण पाणीपुरवठा होत आहे. यामुळे नागरिकांचे आरोग्य धोक्यात आले आहे. महापालिकेत सत्यनारायण महापूजा घालूनही कार्यवाही होत नसल्याने अखेर आज शिवसेना उद्धव बाळासाहेब ठाकरे या पक्षाच्या वतीने महापालिका पाणीपुरवठा अधिकाऱ्याचा घाण पाण्याच्या बाटलीचा पुष्पगुच्छ देऊन उपरोधिक सत्कार केला. आठ दिवसात कार्यवाही न झाल्यास उग्र आंदोलन छेडण्याचा इशारा देण्यात आला. 

शहरात सातत्याने येत असलेल्या दुषित, आळ्यायुक्त पाण्यामुळे नागरिकांचे आरोग्य धोक्यात आले आहे. या प्रश्नाकडे लक्ष वेधण्यासाठी शिवसेना उद्धव बाळासाहेब ठाकरे या पक्षाच्या वतीने आज सोमवारी दुपारी महापालिकेत पाणीपुरवठा अधिकारी व्यंकटेश चौबे यांच्या कार्यालयात त्यांना घाण पाण्याच्या बाटलीचा पुष्पगुच्छ देऊन उपरोधित सत्कार करण्यात आला. यावेळी आंदोलकांनी आपल्या व्यथा मांडल्या. वेळोवेळी आंदोलन करूनही महापालिका प्रशासन कार्यवाही करत नाही. अधिकारी प्रभागात न जाता कार्यालयातच बसून असतात. प्रश्न कसा सुटणार असा सवाल उपस्थित केला. यावेळी उपजिल्हाप्रमुख प्रताप चव्हाण, शहर उत्तर समन्वयक महेश धाराशिवकर, संजय गवळी, बंटी बेळमकर, उज्ज्वल दीक्षित, सतीश माने, प्रकाश ननवरे, विशाल सोरेगावकर, विजय जव्हेरी आदींसह पदाधिकारी व कार्यकर्ते उपस्थित होते.