धक्कादायक: जेवण करताना अन्नाचा घास श्वासनलिकेत अडकल्याने बालकाचा मृत्यू

माढा तालुक्यातील घटना: माढा पोलिसात झाली नोंद

माढा :  माढा तालुक्यातील वाडचीवाडी (उ बु) येथील रोहन सिद्धेश्र्वर निळे (वय ११ ) या बालकाचा जेवण करताना अन्नाचा घास श्वासनलिकेत अडकल्याने मृत्यु झाल्याची दुर्दैवी घटना गुरूवारी सायंकाळी घडली आहे.

कुटुंबीयांनी  दिलेली  अधिक माहिती अशी की, रोहन हा पायाने दिव्यांग होता. महाशिवरात्रीचा उपवास असल्याने बनविलेला गुरुवारी दुपारी शाबुदाणा खाल्ला होता. त्यानंतर त्यास त्रास वाटु लागल्याने त्याला माढ्यातील खासगी रुग्णालयात नेण्यात आले तेथून ग्रामीण रुग्णालयात आणण्यात आले होते. त्यानंतर त्यास माढा ग्रामीण रुग्णालयात  गुरुवार ११ रोजी सायंकाळी साडे सहाच्या दरम्यान उपचारासाठी आणण्यात आले होते. वैद्यकीय अधिकारी डाॅ. सदानंद व्हनकळस यांनी रोहनचा उपचारापूर्वीच मृत्यु झाल्याचे घोषित केले.

त्याच्या पश्चात आई, वडील, एक भाऊ, आजी,आजोबा, चुलते, चुलती असा परिवार आहे. माढा ग्रामीण रुग्णालयात रोहनचे शवविच्छेदन करण्यात आले. या घटनेची ग्रामीण रुग्णालयाच्या वतीने माढा पोलिसांत खबर देण्यात आली आहे.