धक्कादायक; आधी गळा दाबला अन् नंतर पाठीला दगड बांधून दोघांनी विहिरीत टाकले

वाखरी खून प्रकरणाचा उलगडा : दोघे ताब्यात, पाच दिवसांची पोलीस कोठडी

पंढरपूर : प्रेमप्रकरणातून दोघा मित्रांनी लखन गांडुळे या मित्राचा गळा दाबून खून केला. नंतर त्याचे हातपाय नायलॉनच्या दोरीने बांधले आणि पाठीला भलामोठा दगड बांधून विहिरीत टाकून पुरावा नष्ट करण्याचा प्रयत्न केला. मात्र, पोलिसांनी पाच तासांतच या प्रकरणाचा छडा लावला. या प्रकरणी दोघांना ताब्यात घेतले आहे. संशयित आरोपींनी गुन्ह्याची कबुली दिल्याची माहिती पोलीस निरीक्षक धनंजय जाधव यांनी दिली.

लखन सुनील गांडुळे (वय २५, रा. भंडीशेगाव, ता. पंढरपूर) हा बेपत्ता असल्याची फिर्याद त्याचा भाऊ शंभू गांडुळे यांनी पोलिसांत दिली होती. सोमवार, २२ रोजी लखन गांडुळे याचा मृतदेह वाखरी हद्दीतील एका विहिरीत हातपाय दोरीने बांधलेल्या व दगड पाठीला बांधलेल्या अवस्थेत सापडला. पोलिसांकडून ओळख पटवण्याचा प्रयत्न झाला. मृत व्यक्ती ही भंडीशेगाव येथील लखन गांडुळे असल्याचे स्पष्ट झाले. याबाबत लखनचा भाऊ शंभू याने पोलिसांत फिर्याद दिली. या प्रकरणात लखन गांडुळे याच्या दोन मित्रांना पोलिसांनी चौकशीसाठी ताब्यात घेतले. त्यांनी सुरुवातीला उडवाउडवीची उत्तरे दिली. मात्र, पोलिसांनी खाक्या दाखवताच तसेच तपास करताच युवराज सातपुते व तुषार मेटकरी या संशयित आरोपींनी खुनाची कबुली दिली.

---

खून लपवण्यासाठी दोरी आणली

युवराज सातपुते याचे लखन गांडुळे याच्याबरोबर भांडण झाले होते. दोघांचे भांडण हे प्रेम प्रकरणावरून झाले होते. मात्र पुन्हा त्यांच्यात भांडण झाल्याने युवराज सातपुते व तुषार मेटकरी या दोघांनी लखनचा गळा दाबून खून केला. हा प्रकार कोणाला कळू नये म्हणून त्यांनी नायलॉनची दोरी आणली आणि हातपाय बांधले. लखनच्या मृतदेहाच्या पाठीला दगड बांधला व वाखरी येथील याकूब शेख यांच्या विहिरीत टाकून दिला. आरोपींना मंगळवारी न्यायालयात हजर केले असता न्यायालयाने त्यांना ५ दिवसांची पोलीस कोठडी सुनावली.

----