आंध्रातला जावई सोलापुरी सासुरवाडीला आला; चोरट्याकडून रोकड अन् दोन मोबाईलही ढापले

शुक्रवारी रात्री ते सासुरवाडीत मुक्कामी असताना रात्री ११:३० च्या सुमारास ते झोपी गेले.

सोलापूर : आंध्रप्रदेशातील जावई सोलापूरला देवकार्याच्या निमित्ताने सासुरवाडीला आल्यानंतर चोरट्यानं त्याला इंगा दाखवत सासऱ्याच्या घरी जावयाच्या खिशातील रोख रक्कम आणि दोन मोबाईल चोरुन नेले. शनिवारी पहाटे सहाच्या सुमारास ही घटना उघडकीस आली. या प्रकरणी एमआयडीसी पोलीस ठाण्यात गुन्हा नोंदला आहे. यातील फिर्यादीत फिर्यादी रघू कुरमन्ना केंचे (वय- ३४, रा. अमरचिंता महेबूब नगर, आंध्रप्रदेश, सध्या मेघा हिल्स, मादापूर, जि. रंगारेड्डी, तेलंगणा) हे सोलापुरात सासुरवाडीला देवकार्य असल्याचे उच्चेश्वर नगर, भाग ३, कल्लप्पा म्हेत्रे नगर, सोलापूर येथे आले होते. 

शुक्रवारी रात्री ते सासुरवाडीत मुक्कामी असताना रात्री ११:३० च्या सुमारास ते झोपी गेले. पहाटे सहाच्या सुमारास त्यांना जाग आली तेव्हा त्यांना त्यांच्या खिशातली १८०० रुपये रोख रक्कम आणि एक आयफोन व अन्य दुसरा मोबाईल नसल्याचे लक्षात आले. चोरट्याने फिर्यादी झोपलेल्या हॉलचा दरवाजा कुलूप न लावता उघडा असल्याची संधी साधून आत शिरला आणि त्यांनी रोकड व मोबाईल चोरुन नेल्याचे तक्रारीमध्ये म्हटले आहे. या प्रकरणी एमआयडीसी पोलीस ठाण्यात फिर्यादीनुसार गुन्हा नोंदला आहे. तपास पोलीस नाईक गायकवाड करीत आहेत.