अक्कलकोट येथे नवीन रुग्णालयात तीन दिवसात कोरोना रुग्णांवर उपचार

रविवारी सकाळी सोलापूर जिल्ह्याचे पालकमंत्री दत्तात्रय भरणे यांच्या हस्ते अक्कलकोट-मैंदर्गी रोडवरील स्वामी समर्थ देवस्थानच्या रुग्णालयात सुरू करण्यात आलेल्या कोरोना हेल्थ सेंटरचे उद्घाटन करण्यात आले. त्याच दिवशी दिवसभरात पाच रुग्ण दाखल झाले होते. त्यानंतर दुसऱ्या दिवशी दिवसभरात ५ आणि मंगळवारी ७ असे एकूण १७ रुग्ण उपचारासाठी दाखल झाले आहेत. त्यापैकी तीन रुग्ण गंभीर स्वरुपाचे असल्याने त्यांना सोलापूर येथे शासकीय रुग्णालयात उपचार सुरु आहेत. उर्वरित १४ रुग्णांवर स्वामी समर्थ डेडिकेटड कोविड हेल्थ सेंटरध्ये उपचार सुरू आहेत.

सोमवारी दुपारी आमदार कल्याणशेट्टी यांनी नव्याने सुरू झालेल्या रुग्णालयात भेट देऊन रुग्णांची विचारपूस केली आणि वैद्यकीय अधिकारी डॉ. निखिल क्षीरसागर यांच्याकडून अडचणी जाणून घेतल्या. यामुळे रुग्ण व उपचार करणारे वैद्यकीय टीमला आधार मिळाला आहे.

---

नव्याने सुरू करण्यात आलेल्या कोरोना हॉस्पिटलमध्ये उपचारासाठी रुग्ण येत आहेत. सध्या ऑक्सिजनचे उपचार सुरू आहे. रेमडेसिविर इंजेक्शन लवकरच मिळतील. जास्तीत जास्त रुग्ण याठिकाणी बरे करण्याचा आमचा प्रयत्न राहणार आहे.

- डॉ.अशोक राठोड, वैद्यकीय अधीक्षक

----

सदरचे हॉस्पिटल सुरू करण्यासाठी फार मोठे प्रयत्न करावे लागले. यामुळे अनेक गोरगरिबांची सोय होत आहे. सध्या ऑक्सिजनसह अनेक प्रकारचे सुविधा उपलब्ध आहे. उर्वरित गरजाही लवकरच उपलब्ध करून देऊ.

- आमदार सचिन कल्याणशेट्टी

----

२६अक्कलकोट-कोविड सेंटर

अक्कलकोट येथील कोरोना रुग्णालयात रुग्णांचे विचारपूस करून अडीअडचणी जाणून घेताना आमदार सचिन कल्याणशेट्टी यांना महिती देताना डॉ. निखिल क्षीरसागर.