पंचायतीत निर्विवाद मोहिते पाटील गट

प्रताप पाटील यांची बिनविरोध उपसभापतीपदी वर्णी

माळशिरस : पंचायत समिती उपसभापतिपदासाठी आज (सोमवारी) झालेल्या निवडणुकीत मोहिते-पाटील गटाने बाजी मारली. यामध्ये १७ सदस्यांच्या पाठबळावर उपसभापतिपदी प्रताप पाटील यांची बिनविरोध निवड झाली. अर्जुनसिंह मोहिते-पाटील यांनी राजीनामा दिल्याने उपसभापतिपदाची निवडप्रक्रिया पार पडली.

मोहिते-पाटील गटाकडून प्रताप पाटील, तर विरोधी गटाकडून अजय सकट यांनी उमेदवारी अर्ज दाखल केला होता. विरोधी गटाने माघार घेतल्यामुळे प्रताप पाटील हे बिनविरोध विजयी घोषित करण्यात आले. पंचायत समितीमध्ये मोहिते-पाटील गटाचे १४ तर विरोधी गटाची ८ सदस्य संख्या होती. परंतु माजी उपमुख्यमंत्री विजयसिंह मोहिते-पाटील, आ. रणजितसिंह मोहिते-पाटील यांच्या कार्यशैलीमुळे प्रभावित होऊन विरोधी गटाचे अनिल जाधव, विजया धाईंजे, संगीता शेळके यांनी मोहिते पाटील गटात प्रवेश केला. यामुळे मोहिते-पाटील गटाची सदस्य संख्या १७ झाली. तहसीलदार जगदीश निंबाळकर यांच्या अध्यक्षतेखाली पंचायत समिती गटविकास अधिकारी स्मिता पाटील व साहाय्यक शिवाजी पाटील यांच्या उपस्थितीत उपसभापतिपदासाठी निवडणूक पार पडली.

‘शिवरत्न’वर सत्कार

प्रताप पाटील यांची उपसभापतिपदी बिनविरोध निवड झाल्याबद्दल माजी उपमुख्यमंत्री विजयसिंह मोहिते-पाटील यांच्या हस्ते सत्कार करण्यात आला. यावेळी सहकारमहर्षी कारखान्याचे चेअरमन जयसिंह मोहिते-पाटील, सत्यप्रभादेवी मोहिते-पाटील, सभापती शोभा साठे, माजी सभापती वैष्‍णवीदेवी मोहिते-पाटील, माजी उपसभापती अर्जुनसिंह मोहिते-पाटील, किशोर सुळ, सदस्य गजानन एकतपुरे, मानसिंग मोहिते, नानासाहेब नाईकनवरे, अनिल जाधव, विजया धाईंजे, रेणुका माने-देशमुख, ॲड. हसीना शेख, हेमलता चांडोले, लतिका कोळेकर, विद्या वाघमोडे, ताई महाडिक, संगीता शेळके आदी उपस्थित होते.