विठ्ठल मंदिर समिती, सात मानाच्या पालख्या सुरू करणार रेडिओ वाहिनी

पंढरपूर : श्री विठ्ठल-रुक्मिणी मंदिर समितीने आता बदलत्या काळानुसार ‘संतवाणी’ या रेडिओ वाहिनीची निर्मिती करण्याबाबत चाचपणी सुरू केली आहे. यामध्ये मानाच्या सात पालखींची संस्थानेदेखील सहभागी करून घेण्यात येणार असल्याची माहिती मंदिर समितीचे सहअध्यक्ष गहिनीनाथ महाराज-औसेकर यांनी दिली.

खेड्यातील कौलारूच्या घरात बसून ते थेट परदेशातील आलिशान कार्यालयात बसून श्री विठ्ठल-रुक्मिणीचे ऑनलाईन दर्शन घेणे यामुळेच सहज शक्य आहे. मागील काही वर्षांपासून तंत्रज्ञानामुळे पंढरीची वारीदेखील जगभरात पोहोचली आहे. या सर्वांचा विचार करून कोल्हापूर येथील धैर्यशील पाटील यांना संतवाणी कम्युनिटी रेडिओ निर्मितीची कल्पना सुचली.

संत ज्ञानेश्‍वर, संत तुकाराम, संत निवृत्ती, संत सोपानदेव, संत मुक्ताई, संत एकनाथ, संत नामदेव आदीं मानाच्या सात पालख्या निघतात, तेथून ही सुरू केले जाणार आहे. याव्दारे धार्मिक कार्यक्रमांसह सामाजिक, शैक्षणिक, प्रबोधनात्मक, शासकीय माहिती तसेच आपत्ती निवारण आदींविषयी माहिती दिली जाणार आहे.

पंढरीत सप्ताह, कीर्तन, प्रवचन, जयंती, पुण्यतिथी सोहळ्याचे कार्यक्रम आदींची या ठिकाणी रेलचेल असते. हे सर्व कार्यक्रम या रेडिओव्दारे ऐकण्याची संधी भाविकांना मिळणार आहे. किंबहुना गावात कोठेही होणारे कार्यक्रम घरबसल्या ऐकण्याची संधी मिळणार आहे. कीर्तनकार, प्रवचनकार यांना एक मोठे व्यासपीठ याव्दारे मिळेल. मानाच्या पालख्या पंढरीच्या वाटेवर असताना, भाविकांना सरकारी सूचना किंवा भाविकांना माहिती देण्यासाठी या रेडिओचा उपयोग केला जाणार आहे.

शासनाची अधिकृत माहिती देण्यासाठी हे प्रभावी माध्यम ठरणार आहे. या रेेडिओची रेंज २५ कि.मी. पर्यंत राहणार आहे. तसेच मंदिर समिती व सात मानाच्या पालखी संस्थानच्या स्वतंत्र वेबसाईट असून, याला संतवाणी रेडिओची लिंक जोडल्यास जगभरात कोठेही हे रेडिओ चॅनल ऐकणे शक्य आहे.

याबाबत धैर्यशील पाटील यांनी सातही संस्थानच्या पदाधिकाऱ्यांची भेट घेऊन ही माहिती दिली आहे. त्यांनीदेखील यास तत्त्वतः मान्यता दिली असून, नुकत्याच पंढरपूरच्या मंदिर समितीसमोर त्यांनी हा आराखडा मांडला आहे. भाविकांसाठी हे प्रभावी माध्यम असल्याने यास मान्यता मिळणार आहे. याबाबतीत मंदिर समिती पुढाकार घेणार असून, यासाठी येणारा खर्च व तांत्रिक परवानगीसाठी शासनाच्या प्रतिनिधींची भेटदेखील घेण्यात येणार आहे. यावर सर्व संत संस्थानचे प्रतिनिधी व पंढरीची मंदिर समिती यांची लवकरच एक बैठक आयोजित करण्यात येणार आहे.