माढा मतदारसंघात कार्यकर्त्यांचे जाळे विणणार : धैर्यशील मोहिते-पाटील

माळशिरस तालुका भाजपतर्फे माढा लोकसभा मतदारसंघाच्या संघटन सरचिटणीसपदी धैर्यशील मोहिते-पाटील, ओबीसी सेल राज्य उपाध्यक्षपदी अप्पासाहेब देशमुख व जिल्हा उपाध्यक्षपदी रवी पाटील यांची निवड झाल्याबद्दल त्यांचा सत्कार करण्यात आला. यावेळी ते बोलत होते.

पंतप्रधान नरेंद्र मोदी, गृहमंत्री अमित शहा व राष्ट्रीय अध्यक्ष जे.पी. नड्डा यांच्या नेतृत्वाखाली देशात वाटचाल सुरू आहे. राज्याचे विरोधी पक्षनेते देवेंद्र फडणवीस व प्रदेशाध्यक्ष चंद्रकांत पाटील यांनी गावपातळीवर पक्ष संघटना मजबूत करण्यासाठी नऊ सेल निर्माण केले आहेत. या प्रत्येक सेलमध्ये १०० याप्रमाणे तालुकास्तरावर ९०० कार्यकर्त्यांची, तर गावपातळीवर प्रत्येक प्रभागात क्रियाशील कार्यकर्त्यांची फौज निर्माण करण्याचे उद्दिष्ट ठेवले असल्याचे त्यांनी सांगितले.

यावेळी माळशिरस पंचायत समिती सभापती शोभा साठे, उपसभापती अर्जुनसिंह मोहिते-पाटील, सहकारमहर्षीचे उपाध्यक्ष ॲड. प्रकाशराव पाटील, श्री शंकर कारखान्याचे उपाध्यक्ष ॲड. मिलिंद कुलकर्णी, भाजपचे तालुकाध्यक्ष बाजीराव काटकर, किशोरसिंह माने-पाटील, धनंजयराव देशमुख, रामचंद्र सावंत-पाटील, सावता ढोपे, दत्तात्रेय भिलारे, वैष्णवीदेवी मोहिते-पाटील, सुनंदा फुले, अरुण तोडकर, हेमलता चांडोले, केशव पाटील आदी उपस्थित होते.