बादोलेत जिरामणी पळविताना महिलेला पकडले

अक्कलकोट : बादोले येथे एका बंद घराचा कडीकोयंडा तोडून कपाटातून अर्धा तोळ्यांची जिरामणी पळवली आहे. चोरीचा हा प्रकार होता असताना फिर्यादीने आरोपीला रंगेहाथ पकडले आहे.

ही घटना २२ ऑगस्ट रोजी सकाळी ११ वाजण्याच्या सुमारास घडली. याबाबत उत्तर पोलीस ठाण्यात संशयित आरोपीविरुद्ध गुन्हा दाखल करण्यात आला आहे.

याबाबत नम्रता सुरेश माशाळकर (रा. बादोले) यांनी फिर्याद दिली आहे.

पोलीस सूत्राकडील माहितीनुसार २२ ऑगस्ट रोजी रक्षाबंधन असल्याने घराला कडीकोयंडा लावून जवळ राहणारे भाऊ अमर गायकवाड याला राखी बांधण्यासाठी गेल्या होत्या. संशयित आरोपी अनिता राजेंद्र पाटोळे ही महिला कडी काढून घरात प्रवेश करून कपाटातील अर्ध्या तोळ्यांचे सोन्याचे जिरामणी काढून घेतले. दरम्यान नम्रता घरी आल्या असता, घरात चोरी करताना ती रंगेहाथ सापडली.