दारू उधार मागण्यावरून मारहाण, युवकाचा मृत्यू

२३ एप्रिल रोजी सायं. ६.३० च्या सुमारास बाबू बापू अवघडे व सागर बंडू भिसे हे अकलूज येथील एका वाइन शॉपमध्ये गेले. तेथे पिण्यासाठी उधार दारू मागितली. त्या कारणावरून आकाश हेमंत टेके याने बाबू अवघडे याला मारहाण करून जखमी केले. तसेच महेश तुकाराम कोतमिरे (रा. अकलूज) यानेही मारहाण केली.

शामराव अवघडे हा त्याचा भाऊ बाबू अवघडे याला मारहाण केल्याचा जाब विचारण्यासाठी गेला असता आकाश हेमंत टेके, महेश तुकाराम कोतमिरे, रामचंद्र महादेव लोखंडे यांनी वाइन शॉपसमोर मारहाण केली. त्यावेळी सागर भिसे हा मारहाण होईल म्हणून पळून जाताना त्याचा पाठलाग केला. मात्र, सागर बंडू भिसे (वय ३२, रा. जुना बाजारतळ) हा जिवाच्या भीतीपोटी पळत असताना मदारी यांच्या घराजवळ पडून मयत झाला, अशी फिर्याद बाबू बापू अवघडे यांनी दिली. त्यानुसार गुन्हा दाखल आहे.

दरम्यान संशयित आरोपींना अटक केली आहे. पुढील तपास सहा. पोलीस निरीक्षक वैभव मारकड करीत आहेत.