काय सांगता? आता चंद्रावरही मिळणार हाय स्पीड इंटरनेट; 2024 पर्यंत Wifi पोहचवण्याची तयारी सुरू

Moon Internet : पुढील दोन वर्षांच्या आत चंद्रापर्यंत वायफाय सुविधा पोहचवेल. म्हणजेच ही कंपनी चंद्रावर हाय-स्पीड इंटरनेट सुविधा पुरवणार असल्याचा दावा करत आहे.

नवी दिल्ली - सध्या इंटरनेटचा वापर हा मोठ्या प्रमाणात केला जातो. आपल्याकडे इंटरनेट स्पीडवरून दररोज काहींना काही तरी तक्रारी समोर येत असतात. मात्र आता इतर ग्रहांवरही इंटरनेट सुविधा पोहचवण्याच्या गोष्टी केल्या जात आहेत. अमेरिकेच्या एका स्टार्टअप कंपनीने दावा केला आहे की ते पुढील दोन वर्षांच्या आत चंद्रापर्यंत वायफाय सुविधा पोहचवेल. म्हणजेच ही कंपनी चंद्रावर हाय-स्पीड इंटरनेट सुविधा पुरवणार असल्याचा दावा करत आहे.

Aquarian Space नावाची या कंपनीने दिलेल्या माहितीनुसार, ते केवळ दोन वर्षात चंद्रावर वायफाय आणतील आणि त्यानंतर मंगळावर इंटरनेट सुविधा उपलब्ध करून देण्याचे त्यांचे पुढील लक्ष्य असेल. या महत्त्वाकांक्षी प्रकल्पासाठी कंपनीला आतापर्यंत 650,000 डॉलर म्हणजेच भारतीय चलनानुसार सुमारे पाच कोटी रुपये निधी मिळाला आहे.

अ‍ॅक्वेरिअन स्पेसला या प्रोजेक्टसाठी कॅलिफोर्नियाच्या Draper Associates कडून निधी मिळाला आहे. कंपनीचे सीईओ कॅली लार्सेन यांनी सांगितलं की 2021 पर्यंत चंद्राच्या आजूबाजूला 13 लँडर्स, ऑरबिट्स आणि रोव्हर्स होते. 2030 पर्यंत यांची संख्या 200 होण्याची शक्यता आहे. यामुळे एक अब्ज-ट्रिलियन लूनर अर्थव्यवस्थेची निर्मिती होईल, परंतु यासाठी मजबूत कम्युनिकेशन आवश्यक आहे, जो सोलनेटद्वारे उपलब्ध होईल. पृथ्वी आणि चंद्र यांच्यातील उपग्रह नेटवर्क 100 मेगाबाइट/सेकंद वेगाने धावेल, असा कंपनीचा दावा आहे.

2024 नंतर 2025 मध्ये सोलनेट उपग्रह चंद्राच्या दक्षिण ध्रुवावर ठेवण्याची कंपनीची तयारी आहे. नासाच्या कमर्शियल लूनर पेलोड सर्व्हिस प्रोग्राम अंतर्गत या प्रकल्पाचा तांत्रिक आढावा घेतला जात आहे. एरोनॉटिकल स्टार्ट-अप अ‍ॅक्वेरियन स्पेसच्या म्हणण्यानुसार, या सुविधेमुळे अंतराळ यानामध्ये कोणतेही बदल करण्याची आवश्यकता नाही. हायस्पीड इंटरनेटशिवाय अवकाशातील हवामानाची माहिती सोलनेटच्या माध्यमातूनही उपलब्ध होणार आहे. यासोबतच चंद्र आणि मंगळाची शास्त्रीय माहितीही गोळा केली जाणार आहे. एका हिंदी वेबसाईटने याबाबतचे वृत्त दिले आहे.