सावधान! बँकेशी लिंक आहे आधार कार्ड?; हॅकर्स बायोमॅट्रिकने झटक्यात रिकामं करतात अकाऊंट

आधार कार्डच्या माध्यमातून माहिती चोरून फसवणुकीचा हा नवा प्रकार घडला आहे. ही घटना पाहून सायबर एक्सपर्टही हैराण झाले आहेत.

हॅकर्स एखाद्याचा मोबाईल हॅक करतात आणि त्यांचे पैसे बँकांमधून काढून घेतात. काहीवेळा, हॅकर्स अनधिकृत वेबसाइटवरून माहिती चोरतात आणि एखाद्याच्या बँक खात्याला लक्ष्य करतात. अनेक वेळा ते OTP, पेमेंट किंवा QR कोडच्या माध्यमातून लोकांना फसवतात. पण आता फसवणुकीचा एक धक्कादायक प्रकार समोर आला आहे.  OTP किंवा वैयक्तिक माहिती शेअर केलेली नसतानाही खात्यातून सर्व पैसे गायब झाले आहेत.

आधार कार्डच्या माध्यमातून माहिती चोरून फसवणुकीचा हा नवा प्रकार घडला आहे. ही घटना पाहून सायबर एक्सपर्टही हैराण झाले आहेत. हॅकरने प्रथम एका महिलेच्या नावावर असलेल्या घराच्या रजिस्ट्री रेकॉर्डमधून अंगठा आणि बोटांचे ठसे चोरले आणि नंतर त्यांचे संपूर्ण बँक खाते रिकामे करण्यासाठी त्या बायोमेट्रिक्सचा वापर केला. हे प्रकरण ऐकल्यावर अशक्य वाटत असले तरी प्रसिद्ध यूट्यूबर पुष्पेंद्र सिंह याच्या आईसोबतही असेच घडले. त्याच्या यूट्यूब आणि ट्विटर चॅनेलवर, पुष्पेंद्र लोकांना पर्सनल फायनान्स आणि सायबर क्राइमबद्दल सल्ला देतो.

ही संपूर्ण घटना पुष्पेंद्रने आपल्या ट्विटर अकाऊंटवर शेअर केली आहे. गेल्या महिन्यात पुष्पेंद्र फरिदाबाद येथील पंजाब नॅशनल बँकेच्या शाखेत आईच्या पासबुकमध्ये नोंद करण्यासाठी गेला होता. पण एंट्री केल्यानंतर जे समोर आले त्यामुळे त्याला धक्काच बसला. खात्यात शून्य रक्कम होती. त्याने बँकेच्या मॅनेजरला घटनेची माहिती दिली. पुष्पेंद्रला धक्काच बसला, त्याने ताबडतोब आईला फोन करून सांगितले की खात्यात एक रुपयाही नाही.

आई म्हणाली की तिने कधीच पैसे काढले नाहीत, मग तिचे खाते कसे रिकामे असेल? पुष्पेंद्र आपल्या घरी परतला आणि आईसोबत बँकेत गेला आणि पुन्हा बँक मॅनेजरला हा धक्कादायक प्रकार सांगितला. तपासात असे आढळून आले की बिहारमधील एका व्यक्तीने आधार कार्ड डेटावरून घेतलेल्या फिंगरप्रिंटचा वापर करून खात्यातून पैसे काढले होते.

पुष्पेंद्र अजूनही शॉकमध्येच होता कारण त्याने मॅनेजरला सांगितले की त्याच्या आईने कोणताही OTP किंवा आधार कार्ड तपशील कोणाशीही शेअर केला नाही. संपूर्ण प्रकरण जाणून घेतल्यानंतर, बँक मॅनेजरने उघड केले की ही काही पहिलीच घटना नाही, अशाच प्रकारच्या इतर अनेक प्रकरणे आहेत ज्यात हॅकर्सनी प्लॉट/फ्लॅट रजिस्ट्री रेकॉर्डमधून फिंगरप्रिंट्स कॉपी/क्लोन केले आणि बायोमेट्रिक तपशील वापरून अशा घटना घडवून आणल्या. एका हिंदी वेबसाईटने याबाबतचे वृत्त दिले आहे.