लवकरच येणार वन प्लस ५टी स्मार्टफोनचे नवीन व्हेरियंट

वन प्लस कंपनीने आपल्या वन प्लस ५टी या उच्च श्रेणीतील स्मार्टफोनला नवीन व्हेरियंटच्या स्वरूपात सादर करण्याचे संकेत दिले आहेत.

भारतीय बाजारपेठेत वन प्लस ५टी हे मॉडेल ६ व ८ जीबी रॅमच्या दोन पर्यायांमध्ये उपलब्ध करण्यात आले आहे. मध्यंतरी या मॉडेलची स्टार वॉर्स लिमिटेड एडिशन या नावाने नवीन आवृत्ती ग्राहकांना सादर करण्यात आली आहे. यात आता सॉफ्ट गोल्ड या आकर्षक रंगातील नवीन आवृत्तीची भर पडण्याची शक्यता आहे. याचे विविध लीक्स समोर आले आहेत. नावातच नमूद असल्यानुसार हा स्मार्टफोन सॉफ्ट गोल्ड या आकर्षक रंगाच्या पर्यायात ग्राहकांना उपलब्ध करण्यात येणार आहे. अर्थात ब्लॅक, लाव्हा रेड आणि स्टार वॉर्स लिमिटेड एडिशननंतर ही वन प्लस ५टी या मॉडेलची चौथी आवृत्ती असणारा आहे. 

रंगाचा अपवाद वगळता वन प्लस ५टी मॉडेलमधील सर्व फिचर्स आधीप्रमाणेच राहण्याची शक्यता आहे. अर्थात यात ६.०१ इंच आकारमानाचा आणि १०८० बाय १९२० पिक्सल्स म्हणजेच फुल एचडी क्षमतेचा व १८:९ अस्पेक्ट रेशो असणारा २.५डी फुल ऑप्टीक डिस्प्ले असेल. यावर कॉर्निंग गोरीला ग्लास ३चे संरक्षक आवरण प्रदान करण्यात आले आहे. यात ऑक्टा-कोअर क्वॉलकॉम स्नॅपड्रॅगन ८३५ प्रोसेसर असेल. याचे ६ जीबी रॅम व ६४ जीबी स्टोअरेज आणि ८ जीबी रॅम व १२८ जीबी स्टोअरेज असे दोन व्हेरियंट आहेत. याच्या मागील बाजूस ड्युअल कॅमेरा सेटअप प्रदान करण्यात आला आहे. यातील एक कॅमेरा एफ/१.७ अपार्चरसह १६ मेगापिक्सल्स सोनी आयएमक्स३९८ सेन्सरयुक्त असेल. तर दुसरा कॅमेरा एफ/१.७ अपार्चरसह २० मेगापिक्सल्स सोनी आयएमएक्स३७६के सेन्सरयुक्त देण्यात आला आहे. तर यात १६ मेगापिक्सल्सचा सोनी आयएमएक्स३७१ सेन्सरयुक्त फ्रंट कॅमेरा देण्यात आला आहे. हा स्मार्टफोन अँड्रॉइडच्या नोगट आवृत्तीपासून विकसित करण्यात आलेल्या ऑक्सीजन ओएस ४.७.० या प्रणालीवर चालणारा आहे. यात फेस अनलॉक हे विशेष फिचर देण्यात आले आहे.  वनप्लस ५ टी या स्मार्टफोनमध्ये कंपनीच्या डॅशचार्ज हा फास्ट चार्जिंग तंत्रज्ञानाने सज्ज असणारी ३,३०० मिलीअँपिअर क्षमतेची बॅटरी प्रदान आहे.