पासपोर्ट अर्ज प्रक्रियेसाठी नवा नियम, आता DigiLocker वर अपलोड करावे लागतील डॉक्युमेंट, जाणून घ्या, कसे वापरायचे? 

कागदपत्रे अपलोड झाल्यानंतर अर्जदार www.passportindia.gov.in या अधिकृत वेबसाइटद्वारे आपले पासपोर्ट अर्ज ऑनलाइन सबमिट करू शकतील.

नवी दिल्ली : आजपासून म्हणजेच 5 ऑगस्टपासून आंतरराष्ट्रीय प्रवासासाठी पासपोर्ट अर्ज प्रक्रियेत मोठा बदल करण्यात आला आहे . आता नवीन पासपोर्टसाठी अर्ज करण्यासाठी प्रवाशांना डिजीलॉकर वापरून आवश्यक कागदपत्रे अपलोड करावी लागतील. डिजीलॉकर हा सरकारी प्लॅटफॉर्म आहे. 

कागदपत्रे अपलोड झाल्यानंतर अर्जदार www.passportindia.gov.in या अधिकृत वेबसाइटद्वारे आपले पासपोर्ट अर्ज ऑनलाइन सबमिट करू शकतील. परराष्ट्र मंत्रालयाने (MEA) सांगितले की, जर अर्जदारांनी आपली कागदपत्रे डिजीलॉकरद्वारे अपलोड केली असतील तर त्यांना अर्ज प्रक्रियेदरम्यान ओरिजनल फिजिकल कॉपी आणण्याची आवश्यकता नाही. या निर्णयामुळे पासपोर्ट अर्ज प्रक्रियेचा वेळ आणि कार्यक्षमता सुधारेल अशी अपेक्षा आहे.

काय आहे DigiLocker?
डिजीलॉकर हे इलेक्ट्रॉनिक्स आणि माहिती तंत्रज्ञान मंत्रालयाद्वारे प्रदान केलेली डिजिटल वॉलेट सेवा आहे. यामध्ये युजर्स ड्रायव्हिंग लायसन्स, वाहन नोंदणी प्रमाणपत्र आणि मार्कशीट सारखी सरकारी कागदपत्रे सुरक्षितपणे स्टोअर आणि अॅक्सेस करू शकतात. मंत्रालयाने आता ऑनलाइन अर्ज सबमिट करण्यासाठी डिजीलॉकरद्वारे आधार कागदपत्रांचा वापर करण्यास परवानगी दिली आहे.

युजर्स डिजीलॉकरमध्ये शैक्षणिक प्रमाणपत्रे, जन्म प्रमाणपत्रे, पॅन कार्ड, आधार कार्ड, पासपोर्ट आणि मतदार ओळखपत्र यासारखी महत्त्वाची अधिकृत कागदपत्रे देखील स्टोअर करू शकतात आणि अॅक्सेस करू शकतात. हा बदल अर्ज प्रक्रियेला गती देण्यासाठी आणि विविध क्षेत्रांमधील पासपोर्ट सेवा केंद्र (PSKs) आणि पोस्ट ऑफिस पासपोर्ट सेवा केंद्र (POPSKs) येथे फिजिकल डॉक्युमेंट व्हेरिफिकेशनची गरज कमी करण्यासाठी लागू करण्यात आला आहे.

डिजीलॉकर वापरण्याचा निर्णय PSKs वर फिजिकल डॉक्युमेंट व्हेरिफिकेशनदरम्यान आढळलेल्या त्रुटींमुळे घेण्यात आला आहे. जसे की चुकीची जन्मतारीख आणि वैयक्तिक माहिती. डिजीलॉकर लागू करून, सादर केलेल्या कागदपत्रांची अचूकता आणि सत्यता सुनिश्चित करण्याचे सरकारचे उद्दिष्ट आहे.

DigiLocker चा वापर कसा करायचा?
डिजीलॉकर खाते उघडण्यासाठी, वापरकर्त्यांना एक मोबाइल नंबर द्यावा लागेल जो आधीपासून आधारशी लिंक आहे. DigiLocker खात्याची नोंदणी करताना, वापरकर्त्यांना लिंक केलेल्या मोबाइल नंबरवर एक OTP प्राप्त होईल. वापरकर्त्यांना नोंदणी प्रक्रिया पूर्ण करण्यासाठी त्याचा वापर करावा लागेल. DigiLocker खाते नाव अपडेट किंवा मोबाइल नंबर अपडेट यासारखे कोणतेही बदल करण्यासाठी, वापरकर्त्यांनी प्रथम तो डेटा आधारमध्ये अपडेट करणे आवश्यक आहे.