यूएस ओपन : सानिया मिर्झा आणि शुआई पेंगचं आव्हान संपुष्टात

यूएस ओपन टेनिस स्पर्धेच्या महिला दुहेरी गटाच्या उपांत्य फेरीत भारतीय स्टार सानिया मिर्झा व पेंग या जोडीचा पराभव झाला आहे.

न्यूयॉर्क, दि. 9 - यूएस ओपन टेनिस स्पर्धेच्या महिला दुहेरी गटाच्या उपांत्य फेरीत भारतीय स्टार सानिया मिर्झा व पेंग या जोडीचा पराभव झाला आहे. या सामन्यात मार्टिना हिंगिस- युंग जान चान या जोडीनं त्यांच्यावर 6-4,6-4 असा विजय मिळवला आहे.  या विजयसाह मार्टिना हिंगिस- युंग जान चाननं महिला दुहेरी गटाच्या अंतिम फेरीत प्रवेश मिळवला आहे.  

दरम्यान, सानियानं चीनच्या शुआई पेंगसोबत खेळताना उपांत्यपूर्व सामन्यात टिमिया बाबोस- आंद्रिया लावास्कोवा यांचा ७-६,६-४ असा पराभव केला होता. ऑस्ट्रेलियन आणि विम्बल्डन स्पर्धेच्या तिस-या फेरीत बाहेर पडलेल्या सानियाची यंदा ही सर्वोत्कृष्ट कामगिरी आहे. सानियाने मागच्यावर्षी आठ जेतेपद पटकविले त्यापैकी पाच जेतेपद मार्टिना हिंगिससोबत होते. वर्षाअखेर दुहेरी रँकिंगमध्ये सानिया अव्वल स्थानावर होती पण हिंगिसपासून विभक्त होताच वारंवार जोडीदार बदलल्याने सानिया नवव्या स्थानावर घसरली.

व्हिनसचे स्वप्न भंगले
दरम्यान, अमेरिकेची दिग्गज टेनिसपटू व्हिनस विलियम्स हिला यूएस ओपन स्पर्धेच्या उपांत्य फेरीतच आपला गाशा गुंडाळावा लागला. अमेरिकेच्याच स्लोएने स्टीफन्स हिने चुरशीच्या सामन्यात व्हिनसला पराभवाचा धक्का दिला. डाव्या पायाला दुखापत झाल्याने तब्बल ११ महिने कोर्टपासून दूर राहिलेल्या स्टीफन्सने सातवेळेची चॅम्पियन व्हीनस विलियम्सला ६-१, ०-६, ७-५ असे पराभूत केले. अमेरिकेचीच १५ वी मानांकित मेडिसन कीस ही मनगटाच्या शस्त्रक्रियेनंतर दहा महिन्यांनी कोर्टवर परतली. तिने आपलीच सहकारी २० वी मानांकित कोको वांडेवेगे हिच्यावर ६-१, ६-२ असा विजय नोंदवित अंतिम फेरीत धडक दिली. यूएस ओपनच्या अंतिम फेरीत दोन्ही स्थानिक खेळाडू खेळण्याची १५ वर्षांत ही पहिली वेळ आहे. याआधी २००२ मध्ये सेरेना विलियम्सने व्हीनसला नमविले होते. स्टीफन्स आणि कीस या जीवलग मैत्रिणी आहेत. फेडरेशन चषकाच्या संघात त्या सोबतच खेळतात. स्टीफन्स म्हणाली, ‘आमच्यात जीवाभावाचे नाते आहे. दीर्घकाळ सोबत असताना मैत्रिणीविरुद्ध खेळणे सोपे जाणार नाही.’ दोघींमध्ये आतापर्यंत एकमेव लढत मियामी येथे २०१५ ला झाली. त्यात स्टीफन्सने बाजी मारली होती.