अंबरनाथमध्ये जुन्या वादातून २१ वर्षीय तरुणाची हत्या

अंबरनाथ : एका २१ वर्षीय तरुणाची धारदार शस्त्राने हत्या करण्यात आल्याची घटना अंबरनाथमध्ये घडली आहे. भाविक शिंदे असे या तरुणाचे नाव आहे. पोलिसांनी अवघ्या काही तासातच या प्रकरणातील ५ आरोपींना बेड्या ठोकल्या आहेत. मंगळवारी रात्री हा प्रकार घडला आहे.

अंबरनाथ पूर्वेच्या शिवमंदिर परिसरातील शाळेजवळ ही घटना घडली. उल्हासनगरच्या कॅम्प ४ भागात राहणारा भाविक शिंदे हा तरुण काही मित्रांसोबत त्याठिकाणी बसलेला असताना तिथे आलेल्या काही जणांनी जुन्या भांडणांचा राग मनात धरून भाविक याला मारहाण केली आणि धारदार शस्त्राने वार करत त्याची हत्या केली. या घटनेनंतर शिवाजीनगर पोलिसांनी घटनास्थळी धाव घेत भाविक याचा मृतदेह उल्हासनगरच्या मध्यवर्ती रुग्णालयात शवविच्छेदनासाठी पाठवला. यानंतर हत्येच्या तपासादरम्यान अवघ्या काही तासातच पोलिसांनी चार आरोपींना बेड्या ठोकल्या. तर या प्रकरणातील मुख्य आरोपीला पोलिसांनी आज दुपारच्या सुमारास अटक केली. यापैकी चौघांना न्यायालयात हजर केले असता त्यांना ७ दिवसांची पोलीस कोठडी सुनावण्यात आली आहे. या प्रकरणात आणखी कुणाचा सहभाग होता का? तसंच भाविकची हत्या नक्की जुन्या भांडणाच्याच वादातून झाली की अजून काही? याचा तपास आता शिवाजीनगर पोलीस करत आहेत.

----------------------------------------------