जेलमधून लवकर सुटका न केल्याच्या रागातून अंध आईचे डोके आपटले भितींवर, मुलावर गुन्हा दाखल

शेजारच्या तरुणीचे प्रेम संबधातून अपहरण केल्याच्या गुन्ह्यात जेलमधून जामिनावर सुटलेल्या मुलाने आपला संताप स्वतःच्या आईवरच काढला आहे.

बदलापूर : शेजारच्या तरुणीचे प्रेम संबधातून अपहरण केल्याच्या गुन्ह्यात जेलमधून जामिनावर सुटलेल्या मुलाने आपला संताप स्वतःच्या आईवरच काढला आहे. आईने जेल मधून लवकर सोडविण्यासाठी मदत न केल्याच्या गैर समजुतीने आईला बेदम मारहाण करत तिचे डोके भितींवर आपटून गंभीर जखमी केल्याची घटना घडली आहे.

अंबरनाथ तालुक्यातील वांगणी गावात जखमी अंध आई तुलतुली दास ही सून आणि आरोपी मुलासह राहते. विशेष म्हणजे जखमी आई ही अंध असून ती नोकरी करून कुटूंबाची उपजीविका चालवते. काही वर्षांपूर्वीच त्यांच्या पतीचे निधन झाले. त्यामुळे घर खर्चाचा भार एकट्या आईंवर पडला. त्यातच आरोपी दीपंकर याचे एका तरुणीशी प्रेम संबध निर्माण झाले होते. याच प्रेम संबधातून दोघेही घरातून पळून गेल्याने तरुणीच्या घरच्यांनी मुलीचे अपहरण केल्याची तक्रार कुळगांव पोलीस ठाण्यात दाखल केली होती. या तक्रारीची पोलिसांनी गंभीर दखल घेत, या दोघांचा कुळगांव पोलीस पथकाने शोध घेऊन त्यांना कर्नाटकमधून ताब्यात घेतले. त्यानंतर अपहरणाच्या गुन्ह्यात दीपंकर याला अटक करून त्याची रवानगी जेलमध्ये केली. 

दरम्यान, आरोपी दीपंकर हा जेल मधून जामिनावर सुटला असता, तो त्या मुलीला घेऊन आपल्या आई सोबत राहत होता. याच दरम्यान तो कामधंदा करत नसल्याने आईकडे पैश्यासाठी तगादा लावत असे. जर आईने पैसे दिले नाहीतर मारहाण करत होता. शिवाय आईने जेल मधून लवकर सोडविण्यासाठी मदत न केल्याच्या गैर समजुतीने आईला शिवीगाळ करून मारहाण करीत होता. याच वादातून पुन्हा २६ मे रोजी मध्यरात्रीच्या सुमारास आई घरात झोपली असतानाच बेदम मारहाण करत तिचे डोके भितींवर आपटून गंभीर जखमी केले. त्यानंतर आईला बदलापूर ग्रामीण रुग्णालयात उपचार सुरू असताना आईच्या तक्रारीवरून निर्दयी मुलावर कुळगांव पोलीस ठाण्यात गुन्हा दाखल करण्यात आला आहे.