भिवंडीत बेकरीला भीषण आग, परिसरात भीतीचे वातावरण 

आगीची माहिती मिळताच भिवंडी अग्नीक्षमक दलाचे जवान व निजामपूर पोलिसांचे कर्मचारी घटनास्थळी दाखल झाले.

भिवंडी - शहरातील म्हाडा कॉलनी नदी नाका परिसरात असलेल्या बेकरीला मंगळवारी दुपारी भीषण आग लागण्याची घटना घडली.आफरीन बेकरी असे आग लागलेल्या बेकरीचे नाव असून या बेकरीच्या लगतच झोपडपट्टी असल्याने या दुर्घटने नंतर परिसरात भीतीचे वातावरण पसरले होते.

आफरीन बेकरी मध्ये दुपारच्या सुमारास अचानक लागलेली आग काही वेळातच सर्वत्र पसरल्याने बेकरीतील सर्व साहित्य जळून खाक झाले. या बेकरीमध्ये असलेल्या साहित्य मधून मोठा ब्लास्ट झाल्याने परिसरातील झोपडपट्टी मधील नागरिकांमध्ये भीतीचे वातावरण निर्माण झाले होते.आगीची माहिती मिळताच भिवंडी अग्नीक्षमक दलाचे जवान व निजामपूर पोलिसांचे कर्मचारी घटनास्थळी दाखल झाले.

अग्निशामक दलाच्या जवानांनी अथक परिश्रम घेऊन अवघ्या एक तासात ही आग आटोक्यात आणली आहे.यामध्ये कोणती ही जीवितहानी झाली नसून बेकरीचे मोठ्या प्रमाणात नुकसान झाले आहे.यापूर्वी सुद्धा मागील महिन्यात या ठिकाणी आग लागल्याची माहिती नागरिकांकडून मिळाली आहे.