ठाण्यात १९ मजली इमारतीला लागली आग, ३० ते ३५ रहिवाशांची सुखरूप सुटका

ही घटना घोडबंदर रोडवरील भाईंदर पाडा, सुदर्शन हाईट्स या इमारतीत घडली.

ठाणे : केबलला आग लागल्यामुळे १९ मजली इमारतीमध्ये मोठ्या प्रमाणात धुर झाल्याची घटना बुधवारी सकाळी ९ वाजण्याच्या सुमारास समोर आली. यावेळी त्या इमारतीत ३० ते ३५ रहिवाशी अडकले होते. त्यांना सुखरूप बाहेर काढण्यात अग्निशमन दलाच्या जवानांना यश आले. 

ही घटना घोडबंदर रोडवरील भाईंदर पाडा, सुदर्शन हाईट्स या इमारतीत घडली. या इमारतीच्या तळ मजल्यावरील पीओपी सिलिंगच्या वरती असणाऱ्या एल टी केबलला आग लागली. त्यानंतर मोठया प्रमाणात धूर झाल्याने त्या इमारतीत काही अडकले आहेत, अशी माहिती मिळताच घटनास्थळी आपत्ती व्यवस्थापन कक्षाचे कर्मचारी व अग्निशमन दलाचे जवान यांनी धाव घेतली. 

तसेच इमारतीमधील सुमारे ३० ते ३५ रहिवाशांची सुखरूप सुटका करण्यात आली. तसेच लागलेल्या आगीवर नियंत्रण मिळविण्यात अग्निशमन दलाचे जवान व आपत्ती व्यवस्थापन कक्षाचे कर्मचाऱ्यांना सुमारे सव्वा तासांनी यश आले. अशी माहिती आपत्ती व्यवस्थापन कक्षाने दिली.