भिवंडीत टेम्पोच्या धडकेत शाळेत जाणारी चिमुरडी ठार 

शांतीनगर भाजी मार्केट परिसरातील रस्त्यावर दुपारी बारा वाजताच्या सुमारास परिसरात राहणारी इयत्ता पहिली मध्ये शिकणारी आयेराबानो ही मुलगी घरातून मनपा शाळा क्रमांक ७९ येथे शाळेत जाण्या साठी रस्त्यातून जात होती. 

भिवंडी: शहरात शांतीनगर परिसरात एक टेम्पो चालकास अंदाज न आल्याने टेम्पो माघारी आल्याने त्यामध्ये एका सहा वर्षीय शाळकरी चिमुरडीचा दुर्दैवी मृत्यू झाला आहे. आयेराबानो मोहम्मद मुन्नवर अन्सारी वय ६ वर्ष असे मयत चिमुरडीचे नाव आहे. शहरातील शांतीनगर भाजी मार्केट परिसरातील रस्त्यावर दुपारी बारा वाजताच्या सुमारास परिसरात राहणारी इयत्ता पहिली मध्ये शिकणारी आयेराबानो ही मुलगी घरातून मनपा शाळा क्रमांक ७९ येथे शाळेत जाण्या साठी रस्त्यातून जात होती. 

त्याच रस्त्यावरून एक टेम्पो जात होता. त्या ठिकाणी रस्त्यात ड्रेनेजच्या चेंबर मुळे रस्ता उंच झाल्या कारणाने व टेम्पोत क्षमते पेक्षा अधिक वजन असल्याने त्या चेंबर वरून टेम्पो पार न होता टेम्पो माघारी आला.ज्यामध्ये मागून येत असलेली मुलगी या टेम्पो खाली चरडली गेली. स्थानिकांनी धावत जाऊन टेम्पो खालील मुलीला बाहेर काढून स्व.इंदिरा गांधी शासकीय उपजिल्हा रुग्णालयात उपचारासाठी घेऊन गेले असता तिच्या डोक्यास जबर दुखापत होऊन रक्तस्त्राव अधिक झाल्याने डॉक्टरांनी तिला मृत घोषित केले. टेम्पो चालक अब्दुल वाहिद यास नागरिकांनी पकडून शांतीनगर पोलिसांच्या ताब्यात दिले असून पोलिसांनी त्या विरोधात गुन्हा दाखल केला आहे.