दुचाकीस्वाराची सहा वर्षीय विद्यार्थ्याला धडक; डोक्याला गंभीर इजा

अंबरनाथ : आपल्या दोन लहान मुलांना शाळेतून घरी घेऊन जात असताना पाठीमागून येणाऱ्या एका भरधाव दुचाकीस्वाराने सहा वर्षीय मुलाला जोरदार धडक दिल्याची घटना बदलापूर पूर्व परिसरात घडली. याप्रकरणी दुचाकी स्वराच्या विरोधात गुन्हा दाखल करण्यात आला आहे. बुधवारी सायंकाळी साडेपाच वाजता च्या दरम्यान मनोरमा गौतम ही महिला आपल्या दोन लहान मुलांना शाळेतून घरी घेऊन जात होती. यावेळी पाटील पाडा परिसरातील मच्छिमार्केट रोडवरून महिला आपल्या दोन लहान मुलांना घेऊन जात असताना पाठीमागून येणाऱ्या एका भरधाव दुचाकीस्वाराने या महिलेसोबत चालणाऱ्या तिच्या सहा वर्षीय शशांक गौतम या मुलाला जोरदार धडक दिली . 

अपघातात जखमी झालेल्या शशांकला दुचाकी स्वाराने जवळच्या अपोलो रुग्णालयात दाखल केले, मात्र त्यानंतर हा दुचाकीस्वार तिथून पसार झाला. अपघातात शशांकच्या डोक्याला गंभीर इजा झाली असून सिटीस्कॅन केल्यानंतर मुलाच्या डोक्याल्या पाठीमागील बाजूस फॅक्चर झाल्याचे डॉक्टरांनी सांगितले. याप्रकरणी बदलापूर पूर्व पोलीस ठाण्यात गुन्हा दाखल करण्यात आला आहे. मुलाच्या आईने दिलेल्या फिर्यादीनुसार पोलिसांनी अज्ञात दुचाकीस्वारा विरोधात गुन्हा दाखल केला असून या प्रकरणाचा अधिक तपास बदलापूर पूर्व पोलिसांकडू सुरू आहे.