शिकाऊ वाहनचालकामुळे मिलापनगरमध्ये अपघात

डोंबिवली: येथील एमआयडीसीतील मिलापनगरमध्ये पिकअप मालवाहू वाहनाच्या शिकाऊ चालकाकडून अपघात झाला असून त्यात सुदैवाने कोणीही जखमी झाले नाही. शुक्रवारी सकाळी दहा वाजता एका बंगल्यासमोर हेमंत कोशे यांची कार त्यांच्या घरासमोर उभी होती. त्याचवेळी एका मालवाहू पिकअप वाहनाने एका रिक्षासह कारला जोरदार धडक दिली. यात दोन्ही वाहनांचे मोठे नुकसान झाले.

अपघातग्रस्त वाहनात कोणी नसल्याने सुदैवाने कोणीही जखमी झाले नाही . मिलापनगरमध्ये शिकाऊ चालकांकडून गेल्या काही दिवसांत अनेकदा अपघात झाले आहेत. येथील रहिवाशांनी याबाबत गस्तीवरील पोलिसांना अनेकदा तक्रारी केल्या आहेत.

काही दिवसांपूर्वी एका शिकाऊ कारचालकाने दुचाकीवरील दोन महिलांना ठोकर देऊन जखमी केले होते. येथील अंतर्गत रस्त्यांवर वाहतूक कमी आणि रोड मोकळा मिळत असल्याने डोंबिवलीतील अनेकजण वाहन शिकण्यासाठी येथे येत असतात. काही जणांकडे शिकाऊ वाहनचालक परवाना नसतो. अशा वाहनचालकांवर पोलिसांनी कडक कारवाई करावी, अशी येथील रहिवाशांची मागणी आहे.