पानसुपारीचे दुकान फोडणाऱ्यास अटक

ठाणे: पान, सुपारी आणि सिगारेट विक्रीचे दुकान फोडून ८०० रुपयांच्या रोकडसह सहा हजार ६६४ रुपयांचा मुद्देमाल चोरणाऱ्या विजय गंगाधर सोनवणे या सराईत चोरट्याला वागळे इस्टेट पोलिसांनी गुरुवारी अटक केली. त्याच्याकडून चोरीचा ऐवजही जप्त केला आहे.

वागळे इस्टेट नेहरूनगर एचडीएफसी बँकेसमोरील स्वाद पान शॉप या अब्दुल शेख (वय २३, रा. अंबिकानगर, वागळे इस्टेट, ठाणे) यांच्या दुकानात चोरट्याने १५ जून रोजी रात्री ९.३० ते १६ जून रोजी सकाळी ७.३० वाजण्याच्या सुमारास शटरचे लॉक तोडून शिरकाव केला. या दुकानातून रोकडसह सिगारेटची पाकिटे आणि इतर सामान लंपास केले. याप्रकरणी गुन्हा दाखल झाल्यानंतर वरिष्ठ पोलीस निरीक्षक दत्तात्रय ढोले यांच्या मार्गदर्शनाखाली पोलीस हवालदार रावते आणि एस. आर. विनेरकर यांच्या पथकाने विजय सोनवणे याला खबऱ्यांनी दिलेल्या माहितीच्या आधारे तसेच तांत्रिक विश्लेषणाच्या आधारे अटक केली. अगदी अलीकडेच तो अशाच एका चोरीच्या गुन्ह्यात जामिनावर सुटला होता, असे पोलिसांनी सांगितले.