तलवारीच्या धाकावर तरुणाचे अपहरण करणारा जेरबंद

पूर्ववैमनस्यातून तलवारीच्या धाकावर अयतीशान खान (१९, रा. वागळे इस्टेट, ठाणे) या तरुणाचे अपहरण करणाऱ्या टोळीतील साहिल उर्फ आशु प्रमोद मिश्रा (२२, रा. हाजूरी, ठाणे) यास वागळे इस्टेट पोलिसांनी मंगळवारी अटक केली.

ठळक मुद्दे वागळे इस्टेट पोलिसांची कारवाईपूर्ववैमनस्यातून केला हल्ला

लोकमत न्यूज नेटवर्क
ठाणे: पूर्ववैमनस्यातून तलवारीच्या धाकावर अयतीशान खान (१९, रा. वागळे इस्टेट, ठाणे) या तरुणाचे अपहरण करणाऱ्या टोळीतील साहिल उर्फ आशु प्रमोद मिश्रा (२२, रा. हाजूरी, ठाणे) यास वागळे इस्टेट पोलिसांनी मंगळवारी अटक केली. त्याला पोलीस कोठडीत ठेवण्याचे आदेश ठाणे न्यायालयाने दिले आहेत.
अयतीशखान आणि त्याचा मित्र मौसिम खान हे जिलानीवाडी मस्जिदच्या गेटजवळ वागळे इस्टेट येथे १२ जुलै रोजी पहाटे १ वाजण्याच्या सुमारास बसले होते. त्यावेळी बहाद्दुरसिंग मेहरा, शाहरुख खान, साहिल उर्फ आशु आणि अन्य एक जण असे चौघेजण दोन वेगवेगळया मोटारसायकलीवरुन तिथे आले. त्यांनी तलवारीच्या धाकावर अयतीशान याला त्यांच्या मोटारसायकलीवर बसवून ठार मारण्याच्या उद्देशाने अपहरण करुन श्रीनगर, रामनगर भागातील जंगलात नेले. या टोळक्यापैकी बहाद्दूर याने शाहरुख याच्या हातातील तलवार घेऊन अयतीशान आणि त्याच्या मित्राला शिव्या देत तलवारीच्या पुढील टोकाने मौसिम याच्या पाठीवर वार करुन त्याला गंभीर जखमी केले. नंतर या टोळक्याने आपसात संगनमत करुन अयतीशान आणि मौसिम या दोघांना लाथाबुक्क्यांनी मारहाण केली. त्याचवेळी शाहरुख याने मौसिम याच्या डोक्यावर दगडाने प्रहार करुन जखमी केले. त्यानंतर पुन्हा पहाटे ३ वाजण्याच्या सुमारास मोटारसायकलींवर त्यांना बसवून काल्हेर येथील टोल नाक्याच्याजवळ नेऊन तिथेही पुन्हा लाथा बुक्क्यांनी जबर मारहाण केली. या प्रकाराची कुठेही वाच्यता केली तर तुम्हाला आणि तुमच्या आईवडिलांना ठार मारु, अशी धमकीच बहाद्दूर याने त्यांना दिली. या प्रकरणी १३ जुलै रोजी अपहरण आणि मारहाणीचा गुन्हा दाखल झाल्यानंतर वरिष्ठ पोलीस निरीक्षक दत्तात्रय ढोले आणि विजय मुतडक यांच्या मार्गदर्शनाखाली उपनिरीक्षक बाळासाहेब निकुंभ आदींच्या पथकाने यातील आशु उर्फ साहिल याला अटक केली. उर्वरित इतरांचाही शोध घेण्यात येत असल्याची माहिती सूत्रांनी दिली.