लैंगिक अत्याचार करणाऱ्यास अटक

: पत्नीला घटस्फोट देतो, असे सांगून दुसऱ्याच तरुणीला लग्नाचे आमिष दाखवून तिची अश्लील चित्रफीत काढून ती वितरीत करण्याची धमकी देत

ठाणे : पत्नीला घटस्फोट देतो, असे सांगून दुसऱ्याच तरुणीला लग्नाचे आमिष दाखवून तिची अश्लील चित्रफीत काढून ती वितरीत करण्याची धमकी देत तिच्यावर वेगवेगळ्या ठिकाणी लैंगिक अत्याचार करणाऱ्या भरत जैनला (४०) नौपाडा पोलिसांनी अटक केली आहे. गेल्या सात वर्षांपासून तो तिच्यावर अत्याचार करीत होता.
‘पत्नीला घटस्फोट दऊन तुझ्याशीच लग्न करणार आहे’, अशी बतावणी करीत त्याने तिला दगडी शाळा येथे बोलवले होते. तिथून त्याच्या मुंबईतील चंदनवाडीतील घरी, ससून डॉक, कुलाबा, ठाण्यातील कापूरबावडी नाका येथील लॉज अशा वेगवेगळ्या ठिकाणी तिच्यावर लैंगिक अत्याचार केला. याच दरम्यान तिची अर्धनग्न अवस्थेतील छायाचित्रे काढून तिच्या आईवडिलांना पाठविण्याची धमकी दिली. यानंतर त्याने तिच्यावर वारंवार अत्याचार केले. हा प्रकार २००८ ते २४ जुलै २०१५ या कालावधीत सुरू होता. याप्रकरणी त्याच्याविरुद्ध बलात्कार व माहिती तंत्रज्ञान कायद्यानुसार गुन्हा दाखल केल्यानंतर त्याला नौपाडा पोलिसांनी अटक केली. पोलीस निरीक्षक एम.जे. बग्गा याप्रकरणी तपास करीत आहेत.