उल्हासनगरात दोघांवर अट्रोसिटीचा गुन्हा

उल्हासनगर कॅम्प नं-३, परिसरात राहणाऱ्या ज्योती जाधव या एका इमारती मध्ये घरकामाचे काम करतात.

उल्हासनगर : कॅम्प नं-३,शांतीनगर येथील घरकाम करणाऱ्या महिलेला जातीवाचक शिवीगाळ केल्याप्रकरणी दोघांवर मध्यवर्ती पोलीस ठाण्यात गुन्हा दाखल केला. गुन्हा दाखल झालेला एक जण भाजपच्या एका माजी नगरसेवकाचा नातेवाईक असल्याचे बोलले जात आहे.

उल्हासनगर कॅम्प नं-३, परिसरात राहणाऱ्या ज्योती जाधव या एका इमारती मध्ये घरकामाचे काम करतात. या इमारती मध्ये राहणाऱ्या यश वधारिया व रमेश वलेचा यांनी क्षुल्लक कारणावरून महिलेला जातीवाचक शिवीगाळ केली. याबाबत महिलेने मध्यवर्ती पोलीस ठाणे गाठले, मात्र त्यांची तक्रार घेण्यास टाळाटाळ केल्याचा आरोप सामाजिक संघटना व राजकीय पक्षाच्या स्थानिक पदाधिकार्यांनी केला. यातील एक आरोपी भाजपचे स्थायिक माजी नगरसेवकांचा नातेवाईक असल्याचे समजते. अखेर वंचित बहुजन आघाडीचे उज्वल महाले, प्रा.प्रविण माळवे, ईश्वरभाऊ सोनवणे, निलेश देवडे, प्रफुल भालेराव, नितिन भालेराव, कमलताई सोनवणे आदींनी पोलीस अधिकाऱ्याची भेट घेऊन झालेला।प्रकार कानी घातला. त्यानंतर मध्यवर्ती पोलिसांनी ॲट्रोसिटी अंतर्गत गुन्हा दाखल केला. अधिक तपास मध्यवर्ती पोलीस करीत आहेत.