लोखंडी रॉडने मारहाण

----------------------------------------

दांडक्याने मारहाण

डोंबिवली : पूर्वेतील शेलार चौक, त्रिमूर्तीनगर वाल्मिकी वस्ती येथे राहणारा आकाश झिझोटड (२३) हा गुरुवारी रात्री ९ वाजता वाशी, कोपरखैरणे येथून दुचाकीने घरी परतत होता. कोळेगाव-बदलापूर या मार्गावर लघुशंकेसाठी थांबला असता एका कारमधून चार व्यक्ती उतरल्या आणि त्यांनी त्याला ‘तू इथे लघुशंका का करतो, तुझ्या बापाची जागा आहे का?’ असे बोलून दांडक्याने मारहाण केली. याप्रकरणी मानपाडा पोलिसात आकाशच्या तक्रारीवरून चौघांविरोधात गुन्हा दाखल झाला आहे.

---------------------

दुचाकीची चोरी

डोंबिवली : शहरात वाहनचोरीचे सत्र सुरूच आहे. सूरज बिराजदार यांनी त्यांची दुचाकी रविवारी सकाळी ११.४५ ते सायंकाळी ६ च्या कालावधीत पूर्वेतील चित्तरंजनदास रोडवर पार्क केली होती. तेथून ती गाडी चोरीला गेली आहे. याप्रकरणी सूरज यांनी रामनगर पोलिसात तक्रार दिली असून गुन्हा नोंद झाला आहे.

-------------------------------------------

घरफोडीत चांदीचे दागिने लंपास

कल्याण : पूर्वेतील चिंचपाडा रोडवरील संपदा अपार्टमेंटमध्ये राहणारे सचिन कोकणे यांच्या वडिलांचे वर्षश्राद्ध असल्याने ते कुटुंबासह ६ ते ८ जुलै दरम्यान नाशिक येथील त्यांच्या गावी गेले होते. यावेळी त्यांचे कल्याणमधील बंद घराचे कुलूप तोडून चोरट्यांनी घरातील ३७ हजार ७०० रुपयांचा चांदीचा ऐवज चोरून नेला. याप्रकरणी कोळसेवाडी पोलिसात गुन्हा दाखल झाला आहे.

-----------------------

भाजीविक्रेत्या महिलेला लुटले

डोंबिवली : आरती जगदाळे या रविवारी सकाळी १० वाजता आजदेपाडा येथून सागर्लीकडे जाणाऱ्या रोडलगतच्या साध्वी अपार्टमेंटमध्ये गाळ्यासमोर हातगाडीवर भाजीपाला विकत होत्या. त्यावेळी तेथे आलेल्या दोघा अनोळखी व्यक्तींनी संगनमत करून आरती यांच्या गळ्यातील ३० हजार रुपये किमतीचे सोन्याचे मंगळसूत्र आणि अंगठी घेऊन पोबारा केला. याप्रकरणी मानपाडा पोलिसात गुन्हा दाखल झाला आहे.

-----------------------

भरवस्तीत चोरी

कल्याण : पश्चिमेकडील टिळक चौक, लेले वाडा परिसरातील दुकानाच्या पाठीमागील भिंतीस भोक पाडून चोरट्यांनी ४१ हजारांचा सोन्याचा ऐवज चोरून नेला. ही घटना शुक्रवार ते सोमवार या कालावधीत घडली. याप्रकरणी दुकानमालक समीर अमृते यांनी बाजारपेठ पोलीस ठाण्यात दिलेल्या तक्रारीवरून गुन्हा नोंद झाला आहे.

-----------