कारवाईसाठी गेलेल्या एमएमआरडीए अधिकाऱ्यांना मारहाण

भिवंडी : भिवंडी तालुक्यातील कशेळी-काल्हेर या परिसरातील अनेक इमारतींना एमएमआरडीएने बेकायदा ठरवत कारवाई सुरू केली आहे. दोन महिन्यांपासून येथील इमारती पाडण्याचे काम सुरू आहे. डोक्यावरील छत जाणार या चिंतेत रहिवासी आहेत. रहिवाशांचे म्हणणे ऐकण्यासाठी गुरुवारी आमदार शांताराम मोरे, शिवसेना उपजिल्हाप्रमुख देवानंद थळे हे घटनास्थळी आले व एमएमआरडीएच्या अधिकाऱ्यांसोबत चर्चा करत होते. त्याचवेळी संतप्त जमावाने एमएमआरडीएचे अधिकारी मिलिंद प्रधान यांना पोलिसांच्या उपस्थितीतच मारहाण केली.

काल्हेर-कशेळी या ग्रामपंचायत भागात मोठ्या संख्येने इमारती उभ्या राहिल्या आहेत. यापैकी बहुतांश इमारती या एमएमआरडीएने बेकायदा ठरविल्या असून, त्याबाबतचा वाद न्यायालयात प्रलंबित आहे, तर काही इमारती तोडण्याचे आदेश उच्च न्यायालयाने दिले आहेत. त्यानुसार १ जूनपासून या ठिकाणी इमारती तोडण्याचे काम सुरू आहे. काही इमारतींना अवघ्या २४ तासांची नोटीस बजावून इमारत तोडण्यास आलेल्या एमएमआरडीएच्या अधिकाऱ्यांना नागरिकांनी विरोध दर्शवला आहे. या ठिकाणी २००हून अधिक इमारतींना नोटिसा बजावल्या आहेत. कारवाईमुळे हजारो कुटुंब बेघर होणार आहेत. आम्ही मुद्रांक शुल्क भरून बँकेतून कर्ज घेऊन हे फ्लॅट खरेदी केले आहेत, त्यावेळी या इमारती बेकायदा नव्हत्या का ? जेव्हा बांधकाम सुरू होते त्यावेळेस एमएमआरडीएचे अधिकारी झोपा काढत होते का? असा सवाल येथील रहिवाशांनी उपस्थित करत आम्हाला कोरोनामुळे नाहीतर या इमारती तोडल्याने मरण येणार अशी व्यथा महिलांनी बोलून दाखविली.

कशेळी-काल्हेर या परिसरात ठाण्यापेक्षा निम्म्या किमतीत घरे मिळत आहे. बाळकूम येथील एका मोठ्या बिल्डरच्या ५० लाखांच्या घराला ग्राहक मिळत नसल्याने राजकीय व्यक्तींना हाताशी धरून ही कारवाई फक्त काल्हेर, कशेळी या भागांतच करीत असल्याचा आरोप शिवसेना उपजिल्हाप्रमुख देवानंद थळे यांनी केला आहे. एमएमआरडीए अधिकारी येथील विकासकांकडून पैसे उकळत असून, पैसे न देणाऱ्या बिल्डरांच्या इमारतींवर कारवाई करत असल्याचा आरोप केला आहे. येथील इमारती ज्या जागेवर उभ्या आहेत त्या जागा एनए झालेल्या खासगी जागा आहेत. त्यांची परवानगी ग्रामपंचायतीने दिली आहे. घरासाठी अनेकांनी बँकांकडून कर्ज घेतले आहे. त्यांना देशोधडीला लावण्याचे काम एमएमआरडीए अधिकारी करीत असल्याचे सांगत ही कारवाई थांबली नाही तर यापुढे आम्ही आत्मदहन करू, असा इशाराही थळे यांनी दिला आहे.

---------------------------------------------------------------

मुख्यमंत्र्यांना सांगणार रहिवाशांच्या व्यथा

एमएमआरडीए ही कारवाई आकसापोटी करत असल्याचा आरोप आमदार शांताराम मोरे यांनी केला. याबाबत आपण मुख्यमंत्री उद्धव ठाकरे व पालकमंत्री एकनाथ शिंदे यांची भेट घेऊन येथील रहिवाशांच्या व्यथा त्यांच्यासमोर मांडणार असल्याचे सांगितले. पोलीस उपायुक्त योगेश चव्हाण हे पथकासह घटनास्थळी दाखल झाले. त्यांनीही एमएमआरडीएच्या अधिकाऱ्यांनी कारवाई करण्यापूर्वी किमान सात दिवस आधी नोटीस बजावणे गरजेचे असल्याचे सांगत येथील परिस्थितीबाबत वरिष्ठांना अहवाल पाठविणार असल्याचे सांगितले.