पेट्रोलकांडातील बहादूरसिंगला अटक

बारबाला पत्नी तानिया सह तिची भाची शुकीला शेख ह्यांना पेट्रोल ओतून जाळणारा फरार बहाद्दूरसिंग परमार याला अखेर मीरारोड पोलिसांनी राजस्थानच्या माउंट आबू रोड येथून अटक केली

मीरा रोड : बारबाला पत्नी तानिया सह तिची भाची शुकीला शेख ह्यांना पेट्रोल ओतून जाळणारा फरार बहाद्दूरसिंग परमार याला अखेर मीरारोड पोलिसांनी राजस्थानच्या माउंट आबू रोड येथून अटक केली . तानियाने फ्लॅटसाठी लावलेला तगादा व तिचे दुसऱ्याशी अनैतिक संबंध असल्याचा संशय यातून बहाद्दूरने तिला जाळून मारल्याचे सकृतदर्शनी समोर आले आहे .
गुरु वारी ( दि . ३१ डिसेंबर ) पहाटे मीरा रोड हबटाऊन गार्डेनीया मधील ५०१ क्र . च्या सदनिकेत बहाद्दूरने पत्नी तानिया, १३ महिन्यांचा मुलगा जयदेव व तानियाची भाची शुकीला यांना पेट्रोल ओतून जाळले होते . त्यात तानिया व शुकीलाचा मृत्यू झाला. जयदेव सुदैवाने बचावला .
या पेट्रोलकांडामुळे सर्वच हादरले . उपअधीक्षक सुहास बावचे व वरिष्ठ निरीक्षक जगदीश शिंदे यांच्या मार्गदर्शनाखाली उपनिरीक्षक सत्यवान कदम , महेश कुचेकर आदींची पथके फरार बहाद्दूरच्या शोधासाठी रवाना झाली . शनिवारी रात्री बहाद्दूरला माउंट आबू रोडवरून उपनिरीक्षक कुचेकर व पोलिस नाईक ब्राह्मणे यांच्या पथकाने शिताफीने ताब्यात घेतले . पेट्रोलकांडात बहाद्दूरचे हात व चेहरा भाजला आहे . रखवालदार व रहिवाशांनी वेळीच सतर्कता दाखवल्याने जयदेव बचावला. शुकीयाचे जागीच निधन झाले तर तानियाचा इस्पितळात मृत्यू झाला. इमारतीतील सीसीटीव्ही फुटेज व भाडेकरू म्हणून पोलीस पडताळणी केलेली असल्याने आरोपी बहादूर असल्याची ओळख पटली . सोसायटीचे अध्यक्ष विवेक मने यांनी बहाद्दूरच्या खारदांडा येथील अंबिका ज्वेलर्सचे कार्ड घेऊन ठेवल्याने पोलिसांना बहाद्दूर चे खारदांडा येथील घरापर्यंत पोहचणे सोपे झाले .
बहाद्दूरची ओळख व पत्ता सापडल्याने पोलिसांनी त्याचे खारदांडा येथील घर गाठले . काही दिवसांपासून तो घरी आला नसल्याचे समजले . शाळेला सुट्टी असल्याने त्याची पत्नी मुलांना घेऊन नालासोपारा येथे माहेरी गेली होती . पोलिसांनी त्याच्या पत्नीला गाठून चौकशी केली . राजस्थानच्या राजसमंद जिल्ह्यातील चारभूजाजवळ पिपलांत्री हे गाव असल्याचे व त्याची अल्टो गाडी सोबत असल्याचे पोलिसांना समजले .
गाडीचा नंबर मिळताच महामार्गावरील टोल नाक्यांवरून माहिती घेत घेत पोलीस पथक थेट चारभूजा शहरापर्यंत पोहचले. तेथील टोलनाक्यावरून बहाद्दूरची अल्टो पार झाली नव्हती . तोच बहादूर फालना येथील लांबच्या नातलगांकडे आश्रय घेण्याच्या प्रयत्नात होता . परंतु पोलीस त्याचा शोध घेत असल्याचे त्याच्या नातलग, मित्रांना समजले होते . त्याच्या मागावर असलेल्या कुचेकर यांच्या पथकाने त्याला माउंट आबू रोड वरच तो एका ठिकाणी थांबलेला असतानाच धरले .